Nongstoin, Iaiong 09 : Ki Pulit ANTF ka West Khasi Hills kila ioh ban kem ia 4 ngut ki nongkhaii droks bad ioh kurup ia bun bah u droks heroin bad u ganja.
Kat kum ka khubor Pulit, ki Pulit kila ioh khubor ba don 3 ngut ki nongkhaii droks na Nongstoin kiba leit thied droks na Assam bad dei ban wanphai biang sha Nongstoin lyngba ka surok Langpih-Nongstoin.
Ka ANTF kala pynapshrip ia kine ki briew hynnin ka janmiet sngi Ba-ar ha shnong Nonglang bad kila ioh bat ia kine ki briew kiba wan da kawei ka kali ba don u nombor ML06-A-1450.
Kine ki laingut ki kyrteng u Bryan Kharbani ba 29 snem na New Nongstoin, u Donkerry Ryntathiang ba 25 snem na New Nongstoin bad u Morningstar L Rngaid ba 31 snem na Pyndengrei Mawkhmahwir.
Na ka met kine ki briew, ki Pulit kila ioh kurup haduh 15 gram u heroin bad kiwei ki tiar injek droks nalor ka mobile phone bad ka pisa. Ia kine ki tiar la ioh kurup ha ka jingdonlang ki nongai sakhi shimet.
Haba bteng ban khynra ia ka kali kaba niah da u Kostarlin Iawphniaw ba na Mawlai Syiem, Eastern West Khasi Hills, ka ANTF kala ioh ban kurup sa 130 gram u ganja.
Ki Pulit kila rah noh ia kine ki briew sha Nongstoin bad la register case ia ki hapoh ki kyndon ka NDPS ha Nongstoin Police Station. Ka jingtohkit mynta kala iaid shakhmat.
