Shillong, Jymmang 24: Ki Pulit ka East Jaintia Hills, kila ioh ban kem ia laingut ki nongkhaii droks kynthup kawei ka Kynthei ha ka sngi ba-ar katba ki dang wan kit droks na Silchar sha Shillong.
Kat kum ka jingong ki Pulit, la ioh ban kem nyngkong eh ia arngut na kawei ka bos tourist AS01-FC-8199 ha ki thain Umtyra bad ia kine ki arngut la ithuh da u Passar Uddin ba khot sin u Samir bad u Dipak Baidya uba dei na Polo, Shillong.
U Superintendent of Police ka East Jaintia Hills Jagpal Singh Dhanoa hynne ka sngi Balang u pyntip ba ha ka jingtalasi ia ka kali, ki Pulit kila ioh kurup ia kawei ka pla rong iong ba don u powder rong stem bala thep ha ki 9 tylli ki synduk sabon.
Ki pulit kila leh test ia une u powder bad la pynthikna ba u dei u heroin uba khia haduh 100.56 gram.
Ha ka jingtohkit, ka kynhun ki Pulit na East Jaintia Hills kila wan hiar sha Shillong ban kem ia ka Maya Gwala ba ju khot sin ha Pushki, kaba dei ka nongsuhbuit bad ka nongphah wan rah bad nongbei tyngka ia une u droks.
Ia ka Pushki la kem na ka iingsah jong ka na Polo, Shillong da ka jingiarap ki Pulit ka Pastuer Beat House bad ka ANTF ka East Khasi Hills. Ia kane ka briew la kit noh sha Khliehriat ban pynlong ia ka jingtohkit.
