Shillong, Nailur 21 : Ki Pulit ka East Khasi Hills, kila ioh kem ia 2 ngut ki briew kiba suba donkti ha ka jingpyniap klep ia uwei u rangbah ba 36 snem ha Laitkor myn ha ka 19 tarik Nailur.
Kine ki arngut ki briew kila shah kem tang hapoh 48 kynta ba jia kane ka kam bymman, ong u Superintendent of Police ka East Khasi Hills Bah Sylvester Nongtner ha ka kyrwoh ba pyllait hynne ka sngi Palei.
Une u briew uba shah pyniap u dei uba la tip kyrteng u William Nongrum uba dei na Khanduli.
U SP u pyntip ba halor ka jingioh jingtip ha ka 19 tarik, ki Pulit kila leit wut wut sha katei ka jaka bad lap ia uwei u briew uba la thiah hapdeng ka jinglyngkien ka snam hapoh ka pyllaw ha ka karkhana kali kaba dei jong u Farid Mukhim ban a Laitkor Mawrie, Lumheh.
Ha ka jingtohkit bha, la shem ba une u briew u don dak mong ha ki bynta ka khlieh bad la ikop ba ula iap.
Halor ka jingsuba shah pyniap, la pyntip noh sha ka kynhun Crime Scene Unit ba kan wan lum sakhi na kane ka jaka bad kila ioh tam ia uwei u steering kali bala suba pyndonkam ha ka jingpyniap bad ruh u bilor umdih bad shiteng bilor ka kyaid na kane ka jaka.
Ia kane ka metiap la pynkit noh sha NEIGRIHMS hospital ha ka 20 tarik Nailur. Ia ka metiap u William Nongrum la wan ban pynithuh da ki bahaiing hasem.
