Jowai, K’lyngkot 20 : Ki Pulit ka West Jaintia Hills ha ka step sngi Ba-ar, kila ioh ban kem haduh 18 ngut ki nong Bangladesh kiba wan rung be-ain shapoh u pud u sam jong ka District.
Kat kum ka khubor Pulit, ka kynhun Special Team ki Pulit ka WJH ryngkat ka jingsynran u Rangbah Shnong bad ka VDP ka shnong Demthring, kila ioh kem nyngkong eh ia 4 ngut ki nong Bangladesh na kawei ka kali ML04-D-7339 kaba niah da u Vishal Dkhar ba na Dawki.
Ia kane ka kali lah ioh ban bat ha ka por 3 baje mynstep hadien ka jingkthong naduh Lad Demthring bad lah ioh ban bat ia ka hajan ka Sanmala Guest House, kaba don ha Amlarem.
Ha kane ka jingkhynra, ki Pulit kila ken ruh ia arngut ki nong India-u Meban Dkhar bad ka Melari Rasmut na Lad Demthring lem bad ka kali ba ki iashong, kaba don u nombor ML04-D-4739.
Haka jingtohkit, u Meban Dkhar ula phla ia ka jingdon sa lai tylli ki kali kiba kit ia ki nong Bangladesh kaba mih na Jowai ban leit sha Dawki. Ki Pulit haba ioh ia kane ka jingtip, kila buh ia ka jaka talasi kali haka thain Iew Amlaren bad ha ka por 3:45 baje mynstep lah ioh ban bat noh ia kine ki kali.
Kine ki kali ki dei kiba don u nombor ML05-AD-6424 ba niah da u Blessing Pamthied na ka shnong Jarain, ka kali nombor ML04-D-4993 ba niah da u Twel Rongngi ba na shnong Shkentalang bad ka kali nombor ML04-E-0640 ba niah da u Rimi Lyngdoh na ka shnong Shkentalang.
Kine ki lai tylli ki kali kila kit haduh 14 ngut ki nong Bangladesh.
Ha kane ka jingkhynra, ki Pulit kila ioh kem haduh 18 ngut ki nong Bangladesh, 2 ngut ki nong India ba iarap bad 5 ngut ki nongniah kali lem bad kurup ia 5 tylli ki kali.
Ki Pulit kila register case ia kane ka jingjia bad iakine ki briew baroh lah kem noh ban pynlong ia ka jingtohkit hapoh ki kyndon ka Immigration and Foreigners Act, 2025.
