Kem ki Pulit ia 10 ngut ki dkhot ka HNYF ba khang ia ki kali Tourist ka Assam

Ka Ain kan shim iala ka jong ka lynti : DyCM

Shillong, Naitung 26 : Ki Pulit ka East Khasi Hills, kila kem haduh 10 ngut ki dkhot ka seng Hynniewtrep National Youth Front (HNYF) namar ka jingbat bad pynphai ia ki kali tourist ka Assam ha Umtyngngar, kiba thmu ban leit sha ki jaka jngohkai ha Sohra bad Dawki hynne ka sngi Thohdieng.

Kat kum ka jingiathuh u Superintendent of Police ka East Khasi Hills Bah Sylvester Nongtnger, kine ki 10 ngut kila shah kem bad la register case pyrshah ia ki.

U President ka HNYF Bah Sadon K Blah ula ong ba kane ka jingtalasi kali Tourist ka dei kaba la leh ban phah ia ka khubor kaba shai sha ka Sorkar Jylla ba kan buh noh mardor ia ki Entry-Exit Point kumba la kdew ha ka Meghalaya Residents Safety and Security Act (MRSSA), 2016, kaba ong ba ‘Wat ki Nongshangkai pyrthei kin hap ban pyni ia ki kot ki slab a pynshisha ba ki wankai sha Jylla kum ki nongshangkai”.

Ula ong ba ka jingbym lah jong ka Sorkar ban buh ia ki Entry-Exit Point kala pynbor ia ki dkhot ka HNYF ba kin leh eiei hi dalade. “Hooid ngi kubur ba ki kwah ia ki nongwan shangkai hynrei ngim pynlong sohpdung ia ki nongshangkai hynrei ngi kwah ia ka Sorkar ba kan pyntrei ia ka MRSSA” ula bynrap.

Haba khein ia kane ka jingjia kum ka jingjia ba sngewsih, u Symbud Myntri Rangbah ka tnad kam Pohiing (Police) Bah Prestone Tynsong ula ong “Ka long kaba sngewsih ia kaei kaba jia hynne ka sngi bad ngim don jingtip satia bad ngi khlem khmih lynti ruh ba katto katne ki kynhun ki briew kin shu leh kumtei (talasi ia ki nongshangkai ba wankai sha Sohra bad Dawki).

Ula kular “Ai ong ia phi da kaba shai kdar ba ka ain kala shim iala ka jong ka lynti. Ngin nym ailad ia kum kine ki jingjia ba kin nang jia biang”.

“Nga kren biang da kaba shai ia kano kano ka jingeh ba phi don. Ngi don hangne ban iakren, ka jingkhang ka plie, shong bad iakren bad ngin sa shim ia ka rai. Kane ka long kaba kongsan” ula ong.

Halor ka jingkawang petrol bomb ia ka Iing ha Jhalupara, u Bah Prestone u pyntip ba kam pat don sati aka jingkem briew hynrei ki Pulit kila iaid shaid shaid ha ka jingtohkit ban lah pynithuh ia ki briew kiba donkti ha lyndet kane ka kam.