Shillong, Nailur 13: Ki shipai Border Security Force (BSF) Meghalaya kila iohkem ia uwei u nong Bangladesh na khappud kaba don ha West Jaintia Hills bad ioh kurup iaka ksiar kaba u thmu ban khaii tuh shapoh ri India.
Ki BSF kila pyntip ba utei u nong Bangladesh uba la shah kem la tip kyrteng kum u Md. Hason Ali (62 snem) uba na Sylhet Bangladesh bad lah ioh ban kurp 3 tylli ki biskit ksiar kiba don 348 gram bad shongdor kumba T.17,57,748.
Ia une la ioh bat najan ka ICP Dawki ha ka por ba u dang wan rung tuh shapoh ri India ban leit sha ka Iew kaba don ha Dawki.
Ha ka jingtohkit ki BSF, u Ali ula phla ba ula shim ia katei la ksiar na ka thain Mahajanpatti kaba hap ha Sylhet, Bangladesh bad u thmu ban leit die ia ka ksiar ha Guwahati, Assam.
U Public Relations Officer ka BSF Meghalaya Frontier u Sh. Raj Singh Kataria ula ong, ki BSF kila shim ia ki sienjam ban pynsangeh shi syndon ia ki kam khaii be-ain ha khappud jongka ri India & Bangladesh bad ki shipai BSF ki long kiba peitngor baroh 24 kynta bad kila pynkhlain ruh iaka kam syntiat.
La iathuh, ba ki BSF kila leit ban aiti ia u briew uba la shah kem sha ki pulit jong ka Dawki Police Station katba iaka ksiar kaba la ioh kurup la aiti noh sha ka Ophis jongka Custom kaba don ha Dawki ba kin leh ia kaba donkam..
