Shillong, Iaiong 06: Ki shipai BSF jong ka 4TH Batallion ha ka 5 tarik mynta u bnai kila ioh kem ia ki 2 ngut ki nong Bangladesh kiba la wan rung be-aiñ shapoh ri India bad 3 ngut kila shah kem napoh steshon Rel.
Kine ki ar ngut ki nong Bangladesh kiba la shah kem ha ki BSF ki kynthup ia u Rahul Amin (37 snem) uba na Sylhet bad u Md Abdul Kasim (36 snem) uba na Sunamganj, Bangladesh.
Ia kine la iohkem najan ka jingkieng Dawki ha ki jaka kiba hap ha West Jaintia Hills District bad la ujor ejahar pyrshah ia kine bad la aiti ruh haki pulit jong ka Dawki PS ba kan leh ia kaba donkam.
Pule lang ia kane: Khang ka Tripura ia ka jingpynpoi sniang hapdeng ka jingsyier na ka jingpang ‘swine flu’
Ki BSF kila pyntip ba kitei kila wan rung be-aiñ shapoh ri India da ka jingthmu ban wan ban shong ban sah bad kumjuh ruh ban iarap iakiwei ruh ki nong Bangla ban wan rung shapoh ri India.
Katkum ka jingphla jong u Rahul Amin, ki shipai BSF kila ioh jingtip ba u don ia ka jingthmu ban leit sha Guwahati ban pdiang ia ki 3 ngut ki nong Bangladesh kiba dang wan na Jammu & Kashmir da ka rel. Kumta ia kitei ki jingtip kiba la phla da u Amin la pyntip noh mardor sha ka GRP Guwahati ha kaba kitei baroh 3 ngut kila shah kem noh napoh Guwahati Railway Station.
