Shillong, Kyllalyngkot 16: Ki shipai BSF Meghalaya hynne ka sngi nyngkong, kila ioh ban bat ia kawei ka trok kaba kit 20 tylli ki masi ba thmu ban khaii be-aiñ sha Bangladesh lyngba ka thaiñ khappud kaba don ha East Jaintia Hills district.
Ia katei ka trok la ioh bat da ki shipai BSF kiba ieng pahara ha ka jingkieng Sonapur, East Jaintia Hills.
Ki BSF ki pyntip ba ka kynhun pahara kila pynsangeh ia katei ka trok naka bynta ban ioh talasi ia ka kali hynrei u nongniah jong ka trok haba ula poi ha katei ka jaka, ula pynher sted pynban iaka trok da ka jingthmu ban phet sha ka thaiñ Umkiang.
Ki pyntip ba kane ka kynhun pahara kala beh thong ia katei ka trok bad hadien katto katne por kila lap ia kane ka trok harud surok katba u nongniah, ula phet krad noh shapoh khlaw.
Ha ka jingtalasi, ki BSF kila lap iaki masi bad kila kurup noh ia katei ka trok ryngkat bad ki masi.
