Shillong, Jymmang 12 : Ki shipai BSF jongka 110 Bn BSF Meghalaya ha ka sngi Palei kila ioh kem ia ar ngut ki nong Bangladesh kiba lawan rung tuh shapoh u pud u sam jong ka ri India lyngba ki thain khappud kiba don ha Meghalaya da ka jingthmu ban wan lute bad ban tuh wan thiem.
Kine ki ar ngut kiba la shah kem ki kynthup ia u Islam Uddin bad u Fazer Ali kiba na Companiganj, Bangladesh kiba la donkti ha kaban tuh ia ki tiar ki tar ha ka jingtei iaki jingker sainar ha khappud bad ki don ruh ia ka jingthmu ban lute ha ki shnong ki thaw kiba donha khappud.
Ia kine ki ar ngut ryngkat bad ki tiar ki tar kiba kila tuh la aiti noh sha ki pulit jongka Bholaganj PS ba kin leh ia kaba donkam bad la ujor ejahar ruh pyrshah ia kine ki nong Bangladesh.
Ki BSF Meghalaya kila ioh kem ia 27 ngut ki nong Bangladesh naduh u bnai Kyllalyngkot kiba la wan rung tuh shapoh khappud jong ka ri India nakylleng ki jaka.
