Nongpoh, Naiwieng 13 : Ki Pulit ka Special Task Force (STF) ka Assam hynne ka sngi, kila ioh ban kem ia arngut ki nongshna pisa thok na khappud Assam bad ioh kurup ia ka machine shon pisa lem bad ka pisa thok ba jan kot T.7 lak
Kine ki arngut ki nongshna pisa thok ki kyrteng u Md Sahil Ali ba 21 snem, uba dei na Karaibill, Bhaoria Bhitha, Kamrup lem bad u Harsh Wahlang ba 20 snem, uba dei na Baridua Khanapara, Ri-Bhoi.
Ki Pulit STF haba ioh jingtip ia ka jingdon ki nongshna pisa thok, kala wan hiar khynra ha Khanapara hynrei kine ki arngut haba iohi ia ki Pulit, kila phet krad da kawei ka Maruti A-Star AS02-F-8100 sha ka thain Koinadhar-APSC Road hynrei ki Pulit kila ioh ban bat noh ia ki ha kane hi ka thain.
Ha ka jingkhynra ia ka kali bad ia kine ki briew, ki Pulit STF kila ioh kurup ia ka pisa thok ba shongdor haduh T.3,70,000, (lut T.500 ba don 740 tylli) bad kawei ka mobile phone.
Da ka jingialam lynti u Md Sahil Sali, ki Pulit STF kila leit ban khynra ia kawei ka Iingwai ha 9th Mer, Baridua, Ri-Bhoi bad ioh kurup biang ia ka pisa thok ba T.3,17,500, kawei ka machine shon pisa thok, kawei ka song jong ki kot sada bala pynwan ha ka lut T500, kawei ka song jong ki kot sad aba dang sop, bad kiwei kiwei.
Ka pisa thok kaba la ioh ban kurup baroh lang ka kot sha ka T.6,87,500. Ki Pulit STF kila kurup noh ruh ia ka kali ba pyndonkam da kine ki briew.
Ia kine ki briew la kit noh da ki Pulit STF bad ka jingtohkit mynta kala iaid shakhmat.
