Shillong, Risaw 06: Haka jingbteng ban tehlakam iaka jingwan buhai shnong ki nong Bangladesh (Rohingya), ka Railway Protection Force (RPF) Northeast Frontier Railway ka la ïoh ban kem haduh 256 ngut ki nongwan buhai shnong beaiñ bad 18 ngut ki Agent India.
Ia kine la kem haka por khynra ha kylleng ki Railway Station bapher bapher jong ka thain shathei lammihngi (N.F) naduh u bnai Kyllalyngkot haduh u bnai Nailur 2024.
Ha kawei ka jingjia ha ka 21 tarik Nailur 2024, ka kynhun RPF Agartala ki la lap ia 11 ngut ki briew kiba suba nong shong shnong beain na Bangladesh.
Kine ki kynthup 4 ngut ki kynthei 7 ngut ki shynrang.
Ha ka jingtohkit, kim shym la lah ban ai kino kino ki kot ki sla kiba biang ban pynshisha iaka jinglong nong shong shnong jong ki.
Hadien ka jingtohkit ki la phla ba ki la rung be-aiñ sha India na Bangladesh bad ki thmu ban ïaid shakhmat sha Mumbai bad Ahmedabad lyngba ka rel.
Ia kine ki poiwir la aiti sha ki Officer In-charge ka tnat Pulit Rel ka Jylla Agartala ban leh ïa kaba donkam katkum ka aiñ.
Ka RPF jong ka N. F. Railway man ka por ka peitngor bha ïa ki nongwan buhai shnong beaiñ, ki jaidbynriew Rohingya.Ki nongtrei RPF kiba la buh ha ki steshon bad ki rel ki long kiba husiar bha ha ki kyrdan bapher bapher ban lap ia kino kino ki jait kam beain khamtam kiba shu wan buhai shnong beain.
