Imphal, Jylliew 10 : Ka National Investigation Agency (NIA) kala kem ia uwei u briew uba la don lypa ha Guwahati Jail namar ka jingdon bynta ha ka jingpyniap klep ia 4 ngut ki riew paidbah ha Bishnapur District ka Manipur, kaba la jia ha u bnai Kyllalyngkot.
“Lunminsei Kipgen alias Langinmang alias Mang alias Levi, uba dei na Manipur, ula shah kem biang ha ka NIA na Central Jail, Lokhra, Guwahati ha ka sngi Saitjain kat kum ki kyndon Unlawful Activities (Prevention) Act bad Arms Act,” ong ka kyrwoh na ka NIA.
Kat kum ka jingong ka NIA, u dei u ba nyngkong eh ban shah kem halor ka jingpyniap dusmon kaba jia ha ka 18 tarik Kyllalyngkot, haba ki riew kiengatiar kila pyniap ia 4 ngut ki riew paidbah kynthup ia uwei u briew bad u Khun hajan ka top um kaba don ha Ningthoukhong Kha Khunou.
Kine ki riew kiengatiar kila synreit kuli naphang na ki tiar siat kiba khlain bor.
Ka NIA, kaba la register ia ka case ha ka 9 tarik Kyllalyngkot, 2024, kala shem ba I Kipgen u donbynta lang ha kane ka jingjia.
