Nongstoin, Jylliew 28 : Ka Khasi Students Union (KSU)-Mairang Circle kala kem ia 2 ngut ki bar Jylla kiba wan die tiar da ka kali ha kylleng ki jaka ka Mairang khlem da don ia ki kot ki sla kiba biang.
Ia kine ki bar Jylla la kem da ka seng ha ka jingialam jong u Education Secretary samla Robin N Nongrem bad u General Secretary ka Pyndengumiong Unit Kharjutang K Syntiew, hynne ka janmiet. Kine ki bar Jylla kila wan da kawei ka Maruti Alto ka bym don satia wat ia u registration nombor.
Haba tohkit, ka seng kala lap ba kine ki briew ki dei kiba wan na Uttar Pradesh bad uwei na ki, u don tang da ka aadhar card bad uwei pat u don tang ka ILP ba rung sha Manipur kaba la kut noh naduh ka 14 tarik Lber, 2023. Kine ki arngut ki kyrteng u Mohd Shariq bad u Nizam Khan.
Kine ki bar jylla kila thok ruh ba ki sah ha Shillong bad kam ba kila ioh rung sha ki shnong ki thaw lyngba ka jingiarap jong ki katto katne ngut ki Khasi.
Ka Seng ka kyntu jur ia ki nongialam shnong ba kin peitngor ia kum kine ki briew kibym lah pynthikna ki dei kiei, kiba la wan rung laitlan sha ki shnong ki thaw.
Ha kajuh ka por, kala kyntu ia ki paradoh para snam ba kin kiar ha kaban ai jaka rieh ia ki briewkiba nabar ka Jylla khnang ba ka imlang sahlang kan lah ban tehlakam ia ki jingsniew kiba ju jia n aka por sha ka por.
Pule lang ia kane: Manipur: Ther tyngeh ka Kuki Inpi ia ka Sorkar Jylla halor ka rai “No Work, No Pay’ ia ki Nongtrei
