Shillong, Nailur 07: Ki Pulit ka Anti Narcotics Task Force (ANTF) ka East Khasi Hills hynne ka miet sngi Balang, kala ioh ban kem biang sa 4 ngut ki snar nongkhaii droks ha ka jingkhynra bala pynlong ha ki thain Dhankheti, Shillong.
Ki Pulit ka ANTF kila pynlong ia ka jingpynap shrip ia kine ki Nongkhaii droks ha ka por 7.30 baje eiei hadien ka jingioh ia ka jingtip ba thikna ia ka jingdon jong kine ki nongkhaii ba wan ban die droks man ka sngi ha ka thain.
Ki Pulit ha kane ka jingapshrip kila ioh kem shuwa ia lai ngut ki briew bad ia kine, la ioh ban kem naka sem ap bos ba don marjan ka Woodland Hospital.
Kine ki Nongkhaii droks ki kyrteng u Polling Star David Nongsieh uba sah ha Mawlai Nongpathaw, u Haokholal Vaite ba na Terakhong, Kangpokp, Manipur bad ka Thangabui Thado ba na Madangrting Block-C.
Na kine ki briew, ki Pulit ka ANTF kila ioh ban kurup haduh lai synduk sabon u droks heroin ba khia 41.18 gram, 4 tylli ki mobile phone, kawei ka thuk thuk Yamaha Ray ZR 125 bad ka pisa T. 35,270.
Hadien kane, ki Pulit ka ANTF kila ioh ban kem biang sa ia kawei ka Kynthei Manipur na Parkiang Lot jong ka Dhankheti kaba kyrteng ka Jessie Lalsangzual ban a Muolhlum Churachandpur, Manipur.
Na kane ka briew, ki Pulit ka ANTF kila ioh ban kurup ia 12 synduk sabon u droks ba khot 147.25 gram, kawei ka mobile phone bad ka pisa ba T. 56,000.
Ia kine ki briew la register case ha Laitumkhrah Police Station bad la pynngat ia ki hapoh ka kyndon jongka NDPS Act.
