Shillong, Naiwieng 04 : Ka kynhun ki Pulit Anti Narcotics Task Force (ANTF) ka West Khasi Hills, hynne ka step sngi thohdieng, kila ioh ban kem ia uwei u Nongkhaii droks bad uwei u nongniah kali, kiba thmu ban pynpoi ia u droks ha sor Nongstoin.
Ia kine ki briew la ioh kem na kawei ka kali ML05-M-1175 ha ka jingtalasi kali kaba la pynlong ha Jaidohkroh, kaba hapoh hapoh ka shnong Ksehkohlong, Nongstoin Police Station.
Kane ka kali ka dei kaba niah da u Teiborlin Mythong ba 36 snem ka rta uba dei na Mawrang Rambrai bad uba shong ba sah ha Mawprem, Pdengshnong, Shillong.
Ha ka jingkhynra ia ka kali, ki Pulit kila ioh ban kurup ia 7 gram u heroin bala thep ha ki 7 tylli ki synduk tin, artylli ki thirnia injek, artylli ka mobile phone bad ka pisa T. 1505 na ka met jong uwei pat uba shong ha kane ka kali.
Une u briew ba ioh ban kurup drok u kyrteng u Riboklang Lyngdoh ba 22 snem uba dei na Mawiong Lumsyntiew, Nongstoin. Nalor kine, ki Pulit kila ioh ruh ban kurup haduh 33 tylli ki tube plastic ba thylli na kane ka kali.
Ia kine ki briew la kit noh sha Nongstoin Police Station bad la pynngat ia ki hapoh ka kyndon NDPS Act.
