Shillong, Jylliew 22 : Ka kynhun ki Pulit Anti Narcotics Task Force (ANTF) hynne ka sngi Saitjain, kila ioh kem ia 4 ngut ki nongkhaii droks na ki artylli ki jaka ha Shillong.
Ki Pulit ANTF lem bad ki Pulit ka Mawlai Police Station, kila ioh kem ia arngut ki nongkhaii droks kiba dei ka Them Metor ha ka jingkhynra ha ISBT, Mawiong. Kine ki arngut ki kyrteng u Ram Singh (29) bad Vijay Singh (20).
Na kine ki arngut, ka ANTF kala ioh kurup ia 9 tylli ki synduk sabon ba thep ia u droks ba 110.32 gram, artylli ki mobile phone bad kawei ka scooty aprilla ba khlem don nombor.
Ha kawei pat ka jingkhynra, ki Pulit ANTF kila ioh kem ia arngut ki nongkhaii droks na ka thain Demthring kaba hap hapoh ka Madanrting Police Station. Kine ki arngut ki kyrteng ka Evanjrlyne Thongni ba na Lapalang bad u John Robert Kharmyndai ba na Nongkyndong.
Ka ANTF kala ioh kurup ia kawei ka synduk sabon ba don u droks ba 11.43 gram na kine ki arngut ha ryngkat bad artylli ki mobile phone bad ka scooty (ML05-L-7620).
