Shillong, Naitung 14 : Ki Pulit ka Anti Narcotics Task Force (ANTF) ka South West Garo Hills, kila ioh kem ia 3 ngut ki snar nongkhaii droks kiba dei na Assam, kiba wan pynpoi droks sha ka District.
Kine ki lai ngut ki kyrteng u Mostafa Sheik ba 24 snem bad u Nur Abdin ba 24 snem kiba dei na Mankachar, Assam lem bad u Meter Ali ba 32 snem uba dei na Tangaon, Assam.
Ia kine ki lai ngut la ioh kem ha ka jingkhynra jong ka ANTF hynnin ka 13 tarik hapoh ka jingialam u Deputy Superintendent of Police ka District ha ryngkat ki Ophisar ka Monabari Outpost bad ka Garabadha Outpost, ha ka thain Borkona kaba hap hapoh ka Monabari OP.
Na kine ki briew la ioh ban kurup haduh 11,000 tylli ki dawai Yaba ba khia haduh 1.06 kilo, 3 tylli ki mobile phone, artylli ki thuk thuk bad kawei ka tari.
Ia kine ki briew la register case ha Ampati Police Station hapoh ki kyndon ka NDPS Act. Ka jingtohkit mynta kala iaid shakhmat.
