Shillong, Jymmang 12 : Ka kynhun ki Pulit Anti Narcotics Task Force (ANTF) ka East Khasi Hills, kila ioh ban kem ia 3 ngut ki nongkhaii droks ha ka jingkhynra bala pynlong hynnin ka miet sngi Palei ha Polo mar pyrshah ka Ophis ka NEEPCO.
Ia kane ka jingkhynra la pynlong halor ka jingioh khubor ba ki don ki nongkhaii droks ha ka thain. Ha ka jingtalasi ia kine ki briew, ka ANTF kala ioh ban kurup haduh 5 tylli ki synduk sabon ba hep ia u heroin ba khia haduh 67.8 gram bad kawei ka tin golden ba don ia u heroin ba khit 0.16 gram nalor lai tylli ki thirnia.
Ka ANTF kala kurup ruh ia kawei ka scooty ba don u nombor ML05-M-0237 bad kane ka Mahindra Maximo Plus pick-up ba don u nombor ML05-N-6577 nalor 4 tylli ki mobile phone bad ka pisa ba T. 2,33,500.
Ka ANTF kala register case ia kine ki briew hapoh ki kyndon jong ka ain NDPS Act. Ka jingtohkit mynta kala iaid shakhmat.
