Shillong, Lber 20 : Ki Pulit ka Anti Narcotics Task Force (ANTF) ka East Khasi Hills, kila ioh kem ia arngut ki snar nongkhaii droks kiba dei na Jylla Tripura bad ioh kurup ia bun bah u droks heroin ba shongdor da ki phew lak tyngka.
Ia kine ki arngut la kem halor ka jingioh khubor ba thikna, na ka thain Happy Valley, kaba hap hapoh ka Madanrting Police Station. Ia kane ka jingkhynra ka ANTF la pynlong hapoh ka jingialam ka kong Sandra Nongdhar, MPS.
Kat kum ka jingpyntip u Superintendent of Police ka East Khasi Hills, kine ki arngut ki kyrteng u Joshua Khiangte Tripura ba 36 snem uba sah ha Damchhara, Tripura bad u Joel Tripura ba 29 snem uba dei na Kachharichara, Damchhara, North Tripura.
Une u Heh Pulit u iathuh ba na kine ki arngut, ka ANTF kala ioh kurup haduh 11 tylli ki synduk sabon kiba thep ia u droks heroin ba khia haduh 139.98 gram.
Nalor u droks, la ioh kurup ruh ia kawei ka Tata Sumo ML05-N-0515, kawei ka Aadhaar Card, kawei ka PAN Card bad kawei ka mobile phone.
Ia kine ki briew la register case hapoh ka NDPS Act bad ka jingtohkit mynta kala iaid shakhmat.
