Kawei ka Ri kawei ka Elekshon | Ka Policy ba biang palat ong u Myntri ka BJP

0
72

Shillong, Iaiong 02 : U Nongialam ka BJP bad Myntri Sorkar Bah A.L. Hek ha ka sngi Balang ula ong ba “Kawei ka Ri, Kawei ka Elekshon” ka dei ka policy kaba biang palat.

Kat kum ka jingong jong u, ka jingtyrwa ban pynlong ha kajuh ka por ia ka elekshon jong ka Lok Sabha bad Assembly Elekshon kan iarap bha ban pynduna ia ka jinglut jingsep ia kine ki elekshon.

“Kawei ka Ri, Kawei ka Elekshon ka dei ka Policy kaba biang palat. Kane ka dei ka jingsngew jong nga shimet” ong u Bah Hek haba iakren bad ki nongthoh khubor.

“Mynta, ngi don shibun tylli ki elekshon ha ka shisnem. Ha man ki elekshon kin pyntreikam ia ka model code of conduct. Lad aka model code of conduct ka treikam, kan pyndkoh ia ka jingiaid kiba bun ki kam pynroi. Kumta ka jingdon bun ki elekshon kan lam sha ka jingtreikam ba bun sngi ki model code of conduct bad ka jinglut jingsep ruh kan bun bha. Mano ban dei kiba duhnong, ki dei ki paidbah jong kane ka Ri” ula batai.

Haba kylli, u Bah Hek ula ong “Ngam ju jingkhuslai lada nga jop ne nga rem ia ka elekshon hynrei kaei kaba nga sngewkhia ka long ia ka roi ka par jong ka Jylla bad kumno ban pynduna ia ki jingpynlut ki bym da donkam jong ka Ri bad ka Jylla Meghalaya”.

La ka BJP kan iakhun ia ka elekshon Garo Hills Autonomous District Council (GHADC) ka ban long ha u snem ban wan, une u Nongialam ka BJP ula ong ba ka party jong u ka dei ka party ka bym treikam satia tang ha ka por elekshon.

“Ka BJP kala treikam khlem shongthait la ka don elekshon ne ym don elekshon bad ka trei 24 kynta shisngi na ka bynta ki paidbah” ula ong.

“Ngim ju pynlong jingialang tang hashuwa ka elekshon. Kaei ka jingmut ban dei ka seng sain pyrthei lada ngim mih iakhun ia ka elekshon” ula ong.