Shillong, Risaw 06 : Ki Nonghikai kiba don ha ka lama jong ka Meghalaya Government Lower Primary School Contractual Teachers’ Association (MGLPSCTA), hynne ka sngi palei, kila tur paidbah sha main Secretariat ryngkat ki Khun ki Kti ban pynbor ia ka jingmynthi ka sorkar ia ka jingiakhih jong ki, kaba la neh shibnai eiei.
Kane ka jingiakhih jong ki nonghikai contract kala sdang naduh ka 7 tarik Nailur hakhmat ka Shillong Civil Hospital.
Kine ki Nonghikai kontrak kila dawa ia ka Sorkar ba kan thung biang ia ki ha ka kam hikai ba ki ju trei baroh shikatta, hadien ba kila shah weng na ka jingbym pass ia ka eksam MTET.
Ki Nonghikai kila rai ban ialeh pyrshah noh ia ka Sorkar hadien shibnai ka jingiakhih ka bym seisoh, da kaba tur sha Secretariat wat hapdeng ka jingpynjari ia ka kyndon 144 CrPC.
Kum shibynta ban pynsaphriang ia u paidbah, ki Pulit kila hap ban kawang haduh 4 tylli ki bomb pynsat khmat wat hapdeng ka jingdon ki Kynthei bad ki Khynnah. Kaba phylla ka long ba ym shym la shem satia ba kin don ki Pulit Kynthei ki ban tehlakam ia ki nonghikai kiba thmu ban tur sha Secretariat.
Ha kajuh ka por, ka Chairperson ka State Commission for Protection of Child Rights Kong Iohmon Syiem, kala shim ia ki jingthoh ba batai ia ka jingjia (statement) na ki Khynnah bad ki Nonghikai Kynthei kiba shah ktah na kane ka jingkawang bomb pynsatkhmat.
Uwei na ki Magistrate ba don ha kane ka jaka, ula pyntip ba u Chief Secretary ka Jylla Bah DP Wahlang, ula khot iakren ia kine ki nonghikai ha ka por 5 baje janmiet hynrei la ong ba ki nonghikai kila kyntait ban iakynduh ia ki Ophisar Sorkar bad ban iai bteng beit da ka jingiakhih.
Ki Nonghikai kila pynpaw ba kin ym kynriah satia na kane ka jaka katba kim pat ioh ia ka jingkular na ka Sorkar ba kan thung biang ia ki ha ka kam ba ki ju trei.
U Bah Freddy Basan, Magistrate u pyntip “U Chief Secretary ula khot iakren ia kine ki Nonghikai hynrei kila kyntait ia kane ka jingkhot”.
Halor kane, u Nongialam ka seng ki Nonghikai kontrak Bah Birbor Riangtam ula ong ba ka jingkyntait ia ka jingkhot iakren ka dei namar ba baroh shikatta, ka Sorkar kala shu kular kai ia ka jingdawa jong ki nonghikai.
“Naduh ki snem ba la dep ka sorkar ka khot iakren iaki nonghikai hynrei haduh mynta ka jingiakren ka la shu sahkut tang haka jingiakren bad kam poi shano shano ruh” ong u Bah Birbor.
“Kam don jingmyntoi ia ngi ban leit iakren bad ka sorkar namar baroh shi katta naka liang ka sorkar ka la shu shong bishar sah iaki jingdawa jong ngi” ula bynrap.
