Shillong, Nailar 30: U Symbud Myntri Rangbah ba khmih ia ka Tnad Industries Bah Sniawbhalang Dhar ha ka sngi Thohdieng, ula ong ba 11 tylli napdeng ki 15 tylli ki karkhana dewbilat kila seng iala ki karkhana hala ka jong ka jaka.
Kat kum ka jingong jong u, ka Sorkar kan sa sdang shen ia ka kam ban pynshisha haba iadei bad ka jingseng ia ki 15 na ki 17 tylli ki karkhana coke hapoh ka Jylla.
Ula pyntip ia kane haba jubab ia ka zero hour notice bala wanrah da u MLA ka VPP na North Shillong Bah Adelbert Nongrum ha Iingdorbar Thaw Ain haba iadei bad ki kompani dewbilat kiba pynieng iala ki karkhana/jaka tih mar ha ki kyrteng jong ki Director trai shnong jong ka kompani bad ka jingdon ki karkhana coke kiba pyniaid ia ki karkhana ha ki jaka bala bat ha ka kyrteng ki paralok trai shnong jong ka kompani ba iatreilang.
“Napdeng ki 15 tylli ki karkhana dewbilat, 11 tylli ki karkhana dewbilat (Star Cement Ltd, Meghalaya Cement Ltd, Amrit Cement Ltd, Dalmia Cement (Bharat) Ltd, Green Valley Industries Ltd, Hills Cement Company Ltd, Star Cement Meghalaya Ltd, Megha Technical & Engineers Pvt Ltd, Jaintia Cement Ltd, JUD Cement Ltd, Goldstone Cements Ltd) kila buh iala ki karkhana hala ki jong ki jaka,” ong u Bah Sniawbha.
U ong “Lai tylli ki karkhana dewbilat – Mawmluh Cherra Cements Ltd, Virgo Cements Ltd bad Billenniun Cements Ltd – kila shu shim wai ia ka jaka na ki trai shimet bad kawei ka karkhana dewbilat RNB Cement Pvt Ltd kala buh ia ka karkhana ha ka jaka ba ai wai da ka Tnad Commerce & Industries”.
U iathuh ba na ki 15 tylli ki karkhana dewbilat, shiphew tylli kata ka M/s Star Cement Ltd, M/s Meghalaya Cement Ltd, M/s Amrit Cement Ltd, M/s Dalmia Cement (Bharat) Ltd, M/s Green Valley Industries Ltd, M/s Hills Cement Company Ltd, M/s Star Cement Meghalaya Ltd, M/s Megha Technical & Engineers Pvt Ltd, M/s Jaintia Cement Ltd bad M/s Goldstone Cements Ltd – kila treikam bad don ha East Jaintia Hills District bad kawei ka M/s RNB Cements Ltd ka don ha Ri-Bhoi District.
Ki don saw tylli ki karkhana dewbilat ki bym treikam haduh mynta. Kine ki dei ka M/s JUD Cements Ltd (East Jaintia Hills), M/s Virgo Cements Ltd (North Garo Hills District), M/s Virgo Cements Ltd (North Garo Hills) bad M/s Mawmluh Cherra Cements Ltd (East Khasi Hills).
Nalor kane, u Bah Sniawbha u pyntip ba napdeng ki 17 tylli ki karkhana coke kiba treikam, 2 tylli ki karkhana- ka Abhi Coke Pvt Ltd bad Jaintia Coke Pvt Ltd kila buh karkhana hala ka jong ka jaka.
“Ka jingpynshisha ia ki kot ki sla jong ki 15 tylli kiwei pat ki karkhana coke kan sa sdang noh shen” ula bynrap.
