Shillong, Iaiong 14 : U Symbud Myntri Rangbah ka Tnad Transport Bah Sniawbhalang Dhar ha ka sngi Nyngkong ula ong ba kan ym don satia kano kano ka project lynti rel ha Ri-lum Khasi-Jaintia tad haduh ba baroh ki la mynjur lang.
Haba iakren bad ki lad pathai khubor, u Bah Sniawbha ula ong “U Myntri Rangbah un dang ban khot ia ka All Party Meeting ka ban iadonlang ki kynhun bapher bapher. Ngin sa iakren bha ia kane ka kam bad ngin sa sngap ruh ia ki”.
Ula kular ruh “Wat khuslai, kan nym don ka project lynti rel tad haduh baroh kila mynjur lang. Ngi ju trei beit na ka bynta u paidbah”.
Ha ka 3 tarik Iaiong, ka Sorkar Jylla kala thaw ia ka All Party Committee halor ki am kiba iadei bad ka jingpyniasoh lynti rel ha Meghalaya.
Kat kum ki kyndon treikam bala buh, la bthah ia ka Committee ba kan shong bishar bad wad ia ki lad ki lynti ban wanrah bad shna ia ka lynti rel ha Meghalaya.
