Shillong, Naiwieng 08 : U Nongaiktien ka NPP Marcuise N Marak ha ka sngi Balang, ula ong ba kan ym don satia kano kano ka jingiapait liang hapoh ka Party na ka kam ban jied ia u kyrtong ban mih aireng ha ka elekshon Lok Sabha 2024 na Shillong Parliamentary seat.
Haba iakren bad ki nongthoh khubor, u Myntri ula ong ba ka Selection Committee kan sa phah ia ka kyrteng jong ki kyrtong sha ka High Command. “Ka High Command kan sa shim rai kat kum ki jingtip kiba lah ban ioh ba mano napdeng ki kyrtong kiba heh ka bok ban ioh ia ka jingjop. Ngin shim rai halor kane ka nongrim”.
“Ka (NPP) dei ka seng sain pyrthei. Ka dei kaba iakhleh bun ki nongialam…namar kata kan mih beit ka jingiasaid bad la ki jong ki jingpynsngew. Ngi dei ka seng sain pyrthei ka ban shim rai da ka jingiamynjur lang bad ban shim ia ka jingmynjurlang ngi donkam ban iohsngew ia ki jingpynsngew na baroh ki liang. Ta ka daw, ki jingiakren kila mih. Hadien ba ngi la dep, ngin sa shim ia ka rai lang. Kam don satia kata ka jingiaphiah liang” ula ong.
Halor ka jingkynnoh ba ka kynhun ki Dhar kila tynruh ia ka kyrteng u MLA barim ka Mawhati Dasakhiat Lamare kum u kyrtong ka Shillong seat, u Marak ula ong ba um don jingtip satia ia kum kane ka jingtyrwa bad ba u donkam ban lum jingtip shuwa hashuwa ba un kren halor kane ka kam.
“Ngim da tip bha satia hynrei ki don katto katne ki kyrtong. U Bah Himalaya Shangpliang, MLA barim ka Mawsynram ruh u don. Nga dang shu tip mynta ia u Bah Dasakhiat Lamare. To ngin peit, ka Party kan sa shim ia ka rai. Ynda ka party kala shim rai ngin sa pyntip sha phi” ula ong.
Une u Nongialam ka NPP ula ong ruh ba um don jingtip satia ba u MLA barim ka Umroi Bah George B Lyngdoh un wan pyniasoh noh sha ka party.
Pule lang ia kane: Iakynduh ki Heh Ophisar ia u Lat ban batai halor ka jingtreikam ka PMTBMBA ha Meghalaya
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai
