Shillong, Risaw 28: U Myntri ka Tnad Pule Puthi Rakkam A Sangma ula ong ba ka jingpyrshang ban pynurlong ia ki jingandnud jong ki Nonghikai ha ki kyrdan bapher bapher, kan shong eh ha ka pla tyngka jong ka Sorkar Jylla.
Haba iakren bad ki nongthoh khubor, u Myntri ula ong ba ka Meghalaya ka don kumba 55000 ngut ki nonghikai bad man ki nonghikai jong ki kyrdan bapher bapher, ki don iala ki jong ki jingdawa ba kynthup ia ka jingthungkam pura noh, ka dfficit pattern, adhoc grant bad provincialisation.
“Hooid, ka Sorkar bad nga ruh nga kwah ban pynurlong ia ka jingangnud jong man ki nonghikai hynrei naba ka Sorkar ka don duna ia ki lad pynmih pisa, kumta kan shong eh haka jingdon pisa jong ka Sorkar” ula ong haba bynrap “Ngi don eh ia ka mon hynrei ngi don ruh ia ki jingeh hakhmat jong ngi namar ka jingduna pisa”.
U Myntri ula kynthoh ia kane halor ka rai ba dang shen ong ka Federation of All School Teachers of Meghalaya (FASTOM) ba buhpor ia ka Sorkar Jylla ba kan pynurlong noh ia ki jingdawa ha kaban kyntiew kyrdan ia baroh ki skul Adhoc sha ki Dificit system hapoh ka 30 tarik Iaiong, 2024.
Haba pynpaw ba ki Nonghikai ki don ha ka thup treikam ba hakhmat eh jong kane ka Sorkar ba mynta, u Rakkam ula ong “Ngi la pyrshang kat kaba lah ban leh ha kaban iarap ia ki nonghikai jong ngi”.
“(Hynrei), lada ngi lah ban pyntreikam ia ka jingdawa jong kiwei ki nonghikai, kiwei pat kin wan ban tynruh bad dei namar kane ngi hap ban shimkhia lang ia baroh”.
Ula ong ba ki Nonghikai SSA kila dawa ban thungkam pusa noh ia ki katba ki nonghikai Adhoc kila dawa ia ka difcit pattern bad ki nonghikai deficit pat ban provincialization ia ka kam jong ki.
Halor ka jingkylli, u Myntri ula ong ba kan dei ka jingkit kaba rahbah ia ka Sorkar Jylla lada ka dei ban pyntreikam ia baroh ki jingdawa jong ki Nonghikai.
“Hynrei kam mut pat ba ka Sorkar ka ong ‘Em’ hynrei ha kine ki san snem, ka Sorkar kala kyntiew ia ka adhoc grant jong ki nonghikai ha ka secondary level bad ngi la kyntiew arshah ia ka tulop ki nonghikai skul pre primary bad ki cook cum helper. Ngin dang iai bteng ban leh ia kane namar ki nonghikai ki dei kiba ngi la shimkhia hakhmat eh” ula kular.
