Guwahati, Nohprah 19 :Ka kyrteng jong u Lionel Messi kala sawa jam ha satlak ka pyrthei hadien ba ka Argentina kala lah ban pynrem noh ia ka France ha ka FIFA World Cup final.
Hynrei, watla katta ki nongkyrshan mynta kila wanrah ia ki jingmutdur ba pyniasoh da kaba kam ba une u khlur ialehkai football ka Argentina 35 snem rta u dei uba la kha ha Assam.
Ka jingshisha hi ka long ba u Lionel Messi u dei uba la kha bad la heh la san ha ki bynta pdeng jong ka ri Argentina.
Ha kawei pat ka bynta, ka jingpynpaw kaba lyngba ka twitter kaba la saphriang hynrei ia kaba la pyndam noh da u MP ka Congress u Abdul Khaleque ka pyni ia ka jingkyrshan dohiap ka jong u bad halor ka jingieit ia u Messi, hynrei namar ka jingkmen kaba palat pud ula kam ba une u khlur ialehkai ka Argentina u dei uba la kha hapoh Assam.
Lyngba ka twitter kaba la pyndem noh kham hadien, une u MP ka Congress ula thoh; “Ka jingkhublei naduh ka mynsiem.Ngi sngew sarong na ka bynta jong phi namar ka jingdon jingiadei bad ka Assam.”
Nalor kata uwei na ki nongpyndonkam social media ula kyllia ia une u MP ba ha kano ka rukom u Messi u don jingiadei bad ka Assam, une u MP ula jubab : “Hooid, la kha ia u ha Assam.”
Ha kawei pat ka liang mynta ki jingkynthoh biria ba bun rukom kila sdang ban saphriang lyngba ki social media, ha kaba kila don ruh kiba kren biria da kaba ong; “Lada la kha ia u Messi ha Assam” un jin da la ioh ia ka kam sorkar kum u DSP.
