Shillong, Nohprah 19: Ki 2 ngut ki MLA Congress kiba la ieh noh ia ka kam long Nongmihkhmat-ka MLA jong ka East Shillong kong Ampareen Lyngdoh bad u MLA ka West Shillong bah Mohendro Rapsang hynne ka sngi nyngkong, kila pynpaw ba ki don ka jingshaniah haka National People’s Party (NPP) ba kan lah pynbeit ia u pud u sam ka jylla Meghalaya bad Assam.
I kong Ampareen ila ong ba ka ka sorkar Meghalaya Democratic Alliance (MDA) bala ialam daka NPP, kala shim khia ia shibun ki mat kiba iadei bad ka bha ka miat ki paidbah bad ka jylla Meghalaya baroh kawei.
I kong Ampareen ila ong ba kum ka MLA bala don haka sain pyrthei la bun bun snem, i don jingshaniah ruh ba kane ka sorkar haka jingialam ka MDA kan pyndep noh iaka jingiakren pynbeit pud bad ka jylla Assam.
“Haka jingialam ka NPP ka sorkar MDA kala dep ban pynbeit ia u pud haka wat ba nyngkong (Phase I) bad nga ngeit skhem ba ka NPP kan sa lah ruh ban pynbeit ia u pud u sam ha ka wat baar (Second Phase) namar kadei ka party kaba shim khia iaki mat ba donkam jong ki paidbah bad ka jylla” la ong i kong Ampareen.
I kong Ampareen ila ong ruh ba ka sorkar MDA haka jingialam ka NPP kala lah ban iatreilang bad baroh ki 60 ngut ki MLA jong ki sengsain pyrthei bapher bapher ban ia mynjur iaka Resolution ha u snem 2019 hapoh ka Iingdorbar thaw ain ban dawa naka sorkar pdeng ba kan pyntreikam ia ka Inner Line Permit (ILP) ha Meghalaya.
Ka la ong ba lada ka sorkar Meghalaya ka don ne ka ioh daka sorkar ba khlain, kan lah beit ban shim rai haba iadei bad ka jingpyntreikam iaka ILP ne kino ki ain kiba ka jylla ka donkam eh naka bynta ka bha ka miat ki paidbah bad ka jylla.
