Shillong, Nailar 28 : U Nongialam ka TMC bad Myntri Rangbah barim ka Jylla Dr Mukul Sangma, ula leit kam ban shimti ia ka shuki Nongialam ka Liang Pyrshah hapoh ka Iingdorbar Thaw Ain ka Jylla.
Kane ka jingleit kam kala urlong hadien ba u MLA ka Congress Bah Ronnie V Lyngdoh, ula rai ban kyrshan ia ka TMC ba kan shimti ia kane ka shuki.
U Lamphang ka Iingdorbar Thomas A Sangma haba iakren bad ki nongthoh khubor ha ka sngi Balang, ula pynthikna ba u Bah Ronnie V Lyngdoh ula iehnoh ia ka kam Nongialam ka Liang Pyrshah bad ula aiti ia ka shithi ba pynpaw ia ka jingkyrshan jong u ia ka TMC.
Namar kane, u Dr Mukul kum u Nongialam ka TMC Parliamentary Party, ula wan ban kam ia ka shuki kum u Nongialam ka Liang Pyrshah.
U Lamphang ula ong ba da ka jingkyrshan jong u MLA ba marwei ka Congress, ka TMC mynta kala don haduh 6 ngut ki dkhot ha Iingdorbar Thaw Ain, kaba mihkhmat ia 10 % na ka jingdon paid hapoh ka Iing.
U pyntip ba mynta u dang shong bishar ia kane ka jingkam u Dr Mukul.
