Shillong Jylliew 28: U National President ka National People’s Party (NPP) bad u Myntri Rangbah ka jylla u Conrad K Sangma ula kyntait ba ka don ka jingiapait iapra hapoh jong ka seng ne hapoh ka iing ka sem ha kaba iadei bad ka elekshon shiteng samoi kaban sa long ha Gambegre Constituency.
Haba iakren bad ki nongthoh khubor ha ka sngi Thohdieng, u Conrad Sangma ula ong, “Kam don satia kano kano ka jingiapait iapra hapoh ka seng ne hapoh ka iing ka sem”.
Kane ka jingkren ka jongu kadei kum shi bynta ban pynphai kylla halor ka jingkynnoh ba u Hynmen jong u Myntri Rangbah James Sangma, ula kwah ban iakhun ia ka elekshon shiteng samoi ula pynpaw ia ka jingsngewsih halor ka jingthmu ban ai tiket ia ka kurim jong u Myntri Rangbah ka Mehtab Chandee Sangma.
Ha kyntait ia katei ka jingkynnoh, u Conrad ula ong ba kila don haduh 7-8 tylli ki kyrteng kiba la paw bad kiba la iaid bad u lah dep ban iakren bad kitei baroh.
“Ha ka jingshisha dang ha kine ki khyndiat sngi kiba la dep, ngi lah dep ban iakynduh bad ha ka jingialang, baroh bad baroh ki nongialam ka seng, kiba kwah ban iakhun bad ka kyrteng jong ki briew kaba la nang iaid bad paw watla kim shym la kwah ban iakhun ia ka elekshon ne kia kwah ban iakhun ia ka elekshon, kadei da kawei pat ka ishu hynrei ki kyrteng ki jongki kila iaid bha. Kumta kino kino ki kyrteng kiba la iaid bha, ngi lah iasyllok bad baroh bad ngi baroh kila pynthikna ba ki don bad ka seng bad kano kano ka rai kaba ka seng ka shim kan dei ka rai kaba khatduh bad kin burom ia katei ka rai” ula ong.
“Kumta ka seng kala shim ia karai da ka jingiamynjur lang halor katei ka mat bad mynta ka kam ban ai ia ka kaiphod naduh ki Block Level, District Level bad Regional Level ka dang iaid shakhmat bad shisien ba ka State Committee kala pyndep ia la ka kamram kan sa phah ia ka jingtyrwa” ula bynrap.
Nalor kane, u nongialam ka NPP ula ong, “Ngan pynshai sa shisien bak m mih satia kano kano ka jingkylli ba ka don ka jingiapait iapra. Ngi lah long kiba shai kdar ba ngin iatreilang kum ka iing ka sem bad kaba kham kongsan eh kum ka seng saiñ pyrthei bad baroh ki kyrteng kiba la paw kin iatreilang ryngkat ban iakhun lang ia katei ka elekshon”.
“Kila don 7-8 tylli ki kyrteng hynrei kam mut pat ba baroh kila mih madan ban ialap, hynrei kipaidbah kila sei ia ka kyrteng ka jongki kumta baroh kitei ki briew kibangi lah dep kren bad baroh kila ai iaka jingpynthikna ba kano kano ka rai kaba ka seng ka shim kin burom beit ia katei ka rai” ula ong.
 bad u Myntri Rangbah ka jylla u Conrad K Sangma ula kyntait ba ka don ka jingiapait iapra hapoh jong ka seng ne hapoh ka iing ka sem ha kaba iadei bad ka elekshon shiteng samoi kaban sa long ha Gambegre Constituency.){kind=link}