Guwahati, Nohprah 15 :Na ka liang u Myntri Rangbah (CM) ka Assam u Himanta Biswa Sarma ha ka 14 tarik mynta u bnai ula ong ba 50 percent na ka party Congress ka dei kaba hap hapoh ka jingpyniaid ka jong u.
“Nga la don hapoh ka party Congress lah 22 snem bad ka jingiadei ka jong nga bad ki ka dang iai sah.Ki (Congress) kila pan jingmut bad Nga la aijingmut ia ki bad kila pynphai kylliang da kaba vote ia ngi hapoh Rajya Sabha abd ha ka ilekshon jied president,” ong u Sarma haba jubab ia ka jingkylli ba la buh da u nongpathai khubor.
Haba kren ha kaba iadei bad ka jingiakynad hapdeng ki shipai ka India bad China, u CM ka Assam hynnin ka sngi ula ong ba ka liang pyrshah hapoh ka ri kala pynkylla ia kane ka jingiakynad sha ka kam biria ne tamasa.
Lah ban kdew ba naduh ba ka jingiakynad hapdeng ka India bad ka China kala poi ha ka rynsan u paidbah, ka liang pyrshah kala kynthoh beit beit pyrshah ia ka sorkar ba la lamkhmat da ka BJP hapoh ka jingialam jong u Narendra Modi.
Ha katei ka jingiakynad bad ki shipai PLA ka China kaba la jia ha ka 9 tarik mynta u bnai hapoh Tawang sector ka Arunachal Pradesh kila don kumba hynriew ngut ki shipai India kiba la ngat ha ki jingmynsaw ia kiba la pynkit noh shapoh ka hospital shipai ha Guwahati na ka bynta ban aijingsumar.
