Shillong, Rymphang 06: Nga thikna ba mynta ka kynti, ym lah ban thaw sorkar khlem ka UDP bad u Myntri Rangbah ka jylla un dei hi naka United Democratic Party (UDP).
Ia kane la kam da u kyrtong ka UDP na Nongthymmai u bah Jemino Mawthoh haba kren sha ki lad pathai khubor hadien ba thep kyrteng kum u kyrtong ban iakhun ha kane ka elekshon MLA ka ban long ha 27 tarik mynta u bnai.
U bah Jemino ula ong ba u don ka jingkyrmen kaba skhem ba un jop na Nongthymmai bad ka UDP kan sa dei kawei na ki Party kaba donkam eh naka bynta ban ioh thaw sorkar hadien kane ka elekshon ban wan.
Ula ong ba ka jingthikna jong u ban jop ha kane ka elekshon kadei namar ki paidbah ki shaniah bad tip iaki mat ba u ieng bad ki mat baka Party ka ieng naka bynta ka bha ka miat ki paidbah bad ka jylla baroh kawei.
“Kumba paw mynta baroh ki paidbah ki phai khmat sha ka UDP bad nga la thikna ba ka khlem ka UDP yn ym lah ban thaw sorkar hadien kane ka elekshon bad u Myntri Rangbah ka jylla un dei hi naka UDP” la ong u bah Jemino.
Haba ther iaki National Party kiba la kam ba ki seng rilum kila sdang ban jah noh, u bah Jemino ula ong haduh mynta ki paidbah kim pat don kano kano ka jingsngewkmen halor ki kam ba la leh ki National Party.
“Namar ka jingbym don mynsiem jong ki National Party ban trei naka bynta ka jing bha ka jylla, ki paidbah mynta ki phai khmat shaka UDP bad baroh ki lynti ki kdew beit shaka UDP bad dei namar kane, la thikna ba khlem ka UDP ym lah mano mano ruh ban thaw sorkar hadien kane ka elekshon” la kam u bah Jemino.
