Shillong, Rymphang 05 : U Working President ka UDP bad Myntri Sorkar Bah Paul Lyngdoh ha ka sngi Nyngkong ula ong ba kam don satia kano kano ka jingleh ba phylla halor ka rai jong ka Sorkar ban mynjur pynjlan ia ka samoi treikam jong ka KHADC bad GHADC sa hynriew bnai.
“Kaei kaba nga lah ban ong ba kane kam dei ka jingleh ba phylla. Ha ki snem bala leit noh, ia ka GHADC la pynjlan haduh arsnem ha ka por ba u Dr Mukul Sangma u dang dei u Myntri Rangbah. Kumta, ka jingpynjlan ba hynriew bnai haba ia nujor bad kaei kaba la leh ha ki snem bala leit ba pynjlan haduh ar snem, ka dei shisha kaba la pynjlan slem bha” ong u Bah Paul haba iakren bad ki nongthoh khubor.
Ula ong ba ha u snem bala lah, ki District Council kila wan iakren bad ka Sorkar Jylla halor ka jingdonkam ban pynbeit ia ki shnong ki thaw jong kiba bun ki constituency.
