Shillong, Nailur 16 : U MLA ka UDP na Amlarem Bah Lahkmen Rymbui ula pynpaw ia ka jingkut jing mut jong u ban shakri ia ki paidbah kam pher ia kano kano ka kyrdan ba u bat.
Haba kren bad ki nongthoh khubor hadien ba bam smai kum u Myntri Sorkar, u Bah Lahkmen ula ong “Kumba nga ju ong na ka por sha ka por, kam pher kano kano ka kyrdan ba nga bat, ka dei kajuh beit ia nga, ngi donkam tang ban ai ka jingshakri ba bha tam ia ki paidbah. Ha nga, kano kano ka kyrdan ba nga bat, kam don jingpher satia”.
Ula pynpaw ia ka jinglong ba kloi ban shim ia ka jingkitkhlieh bala bynshet ha u da u Myntri Rangbah ka Jylla bad ban pynurlong ia ki jingangnud jong u paidbah.
U Bah Rymbui haba ap ia ka jingbhah kam, ula ong ba kane ka shong ha ka rai jong u Myntri Rangbah.
“Kano kano ka jingbahkhlieh bala tynrong ha nga, ngan pyrshang ban leh hok bad pyrshang ban pynurlong ia ki jingangnud u paidbah kat kaba lah” ula bynrap.
Haba kylli, u Bah Rymbui ula ai ka jingiaroh ia ki jingpyrshang ka Sorkar MDA naduh u snem 2018 ban wanrah jingkylla, pynkylla bad ban shakri ia u paidbah.
“Ka Sorkar MDA naduh u 2018, kala trei shitom ban wanrah jingkylla, pynkylla bad ban ai ka jingkular ia ki paidbah b aka don ka Sorkar ka ban khmih ia baroh ki jingdonkam na ka bynta ka bha ka miat jong ka Jylla” ula ong.
U Bah Rymbui ula pynpaw ba kine ki arsnem shiteng ban wan kan dei ka jingpynbteng ia ki jingpyrshang ka Sorkar ban pynjanai bad ban pynbeit ryntih ia kiei kiba la mad ha kine ki hynriew snem shiteng bala leit noh.
