Shillong, Jylliew 06 : Haba pynshai ia ki jingmut bakla jong kiba bun balang, u Myntri Rangbah ka Jylla Conrad K Sangma ha ka sngi Balang ula ong ba kam long kongsan ba ki college kin hap ban pyniasoh beit ialade bad ka Captain Williamson Sangma State University.
“Ka long kaab donkam ban sngewthuh ba kam don satia ka ain ne ka rule ba ong ba ki College kin hap ban pyniasoh bad ka Captain Williamson Sangma State Univeristy. Ka shong beit ha ka rai jong ki college. Ka dei ka rai jong ki lada ki kwah ban pyniasoh sha NEHU ne sha ka State University” ong u Conrad haba iakren bad ki nongthoh khubor.
Ula pyntip pat ba lada ki college ki dang kwah ban pyniasoh ialade bad ka NEHU, ki samla pule kiba aplai ban rung college kin hap ban bteng ban iakhun ia ka eksam Common University Entrance test (CUET) ban ioh rung klas.
Haba kylli, u Conrad ula ong “Ngin da don ia ki campus ha kylleng ki jaka jong ka Jylla ban pynsuk ia ki college khamtam ha Shillong bad kiwei ki jaka. Yn ym don mano mano ruh ki ban hap pynlut por ha ka leit ka wan”.
