Shillong, Jylliew 28: U Myntri Rangbah ka jylla u Conrad K Sangma ha ka sngi Thohdieng ula ong ba ki mat kiba rit kidei kiba lah ban pynbeit hynrei kam long pat kaba lah ban shu map lut baroh ne ‘blanket amnesty’ ia ka kynhun kieng atiar Hynniewtrep National Liberation Council (HNLC).
Haba iakren bad ki nongthoh khubor, u Conrad K Sangma ula ong, ba ka sorkar jylla kala shimkhia bad ka Sorkar Pdeng ha kaba iadei bad ki mat jingdawa jong ka HNLC.
“Ngi la iakren bad ka Sorkar India bad ngi lah dep ruh ban kren da kaba shai ba haduh kano ka kyrdan kaba ngi lah ban leit bad ia kane lah dep ban pyntip sha ka HNLC bad ki dkhot la bunsien lyngba ka sorkar pdeng bad na ka sorkar jylla. Kumta ki don katto katne ki bynta kiba hap ban bud ha baroh ki jingiakren ia kaba la iadonbynta lang da ka Sorkar India bad kumta, ngi lah bud ia ki kyndon jingbthah bad ia katei ka kam la iaid katkum ki kyndon ba dei ban iaid” ong u Myntri Rangbah.
“Kumta ngim shym la iaid lait na ka rukom treikam bad halor kane, ngi lah kdew ba kino kino ki kam sniew kiba rit kiba la don ne ki mat kiba rit kiba don, ngi lah pynbeit ia ki hynrei ia kino kino ki kam runar kiba la don bad ia kaba la leh ha ki snem kiba la leit, ia kitei ki bynta ngi hap ban khmih bha” ong u Conrad bad ka bynrap, “Kam long kaba iahap ban shu ong, ban shu map lut ia baroh ki kam runar. Ngi ngin ai ne ngi ngin peit katkum ka jinglong ki jingjia, ia kaba hap ban khmih bha”.
U Myntri Rangbah ula ong, “Ka Sorkar India bad ka Sorkar Jylla kila dep kren ba ki kloi ban iakren halor kitei ki mat. Ban pynmih iaka jingthoh ban map ia baroh ki kam sniew, kan iaid pyrshah bad long khongpong na ka rukom treikam, kaba la bud da ka Sorkar India bad Sorkar Meghalaya haba ngi leit ban iakren halor katei”.
Dang mynta u snem, ka HNLC kala weng noh ialade na ka jingiakren iasuk da kaba kynnoh bad ka sorkar kala pulom ha kaban shimkhia ia ki 5 tylli ki mat jingdawa kiba kongsan kaba kynthup, ban map noh ia baroh ki kam sniew kiba la leh da ki nongialam bad ki dkhot jongka seng.
Ha kaba iadei bad ka jingdawa pisa ka seng HNLC na ki nongshong shnong ka jylla, u Conrad ula ong, “Ki kam sniew da kaba shu phah message na ka whatsapp. Ngam tip ha kano ka dur phin batai ia ka jingphah ia ka message na ka whatsapp kum ka jingtreikam, ka long kaba suk ha kine ki sngi ban phah ia ki message na ka whatsapp, hynrei ngi dang trei ha kata ka lynti ban wad ia ki lad ki lynti ban kem bad kumjuh ban pynduh noh ia katei. Ngi dang iatreilang bad ki bor pulit, ngam kwah ban kren eiei than ia kaei bad ngi lah dep ban ioh shuh shuh ia ki jingtip lyngba ki kam syntiat bad ban iohrah ruh ia ki katto katne ki briew bad kane kan iai bteng”.
“Ngi lah iakren ia kane ha ka jingialang hynne ka sngi bad nga la bthah ia ka DG bad ia kiwei kiwei bad pynkhlain bad ban leh bha khnang ba yn lah ban pynsangeh ia ka jingawa pisa kyllum na ki nongshong shnong ka jylla” ula ong.
Ha kaba iadei bad ka jingtreikam ki shnat (Sleeper Cell) jong ka HNLC ia kaba la iohkem noh da ki pulit, u Myntri Rangbah ula ong, “Ka kyntien Sleeper Cell ka long kaba khlaiñ bha ban pyndonkam na ka bynta iano iano ki bym ju treikam hynrei haba kila shah rah bad la bthah ba kin long kiba treikam biang.
“Kam da dei eh, ba kidei kita ki heh ha ka Sleeper Cell hynrei kila don pat ki riewshimet, ia kaba kila ioh tyngkhat ia ka pisa bad la bthah ia ki ban leh ia kino kino ki kam bad ngi kam ia ki ba kidei ki sleeper cell” ula ong.
“Ngi la nang pynkhlain bad pynbha ha baroh ki liang ia ka Cyber Cell bad ngin pynthikna ba ngin pynlut bun ia ka jingbhah tyngka. Kumta ngi dang peitngor bha halor kiei kiei baroh bad kane kadei ka daw ba ngi la lah ban kem ia ki katto katne ki riewshimet bad ngim shym la kheiñ sting pat bad ngin ym leh sting hi ruh. Man la kano kano ka mat, kadei kaba ngi lah shimkhia bha da ngi baroh bad ngi ngin sa eksamin ia kane bad ngin pynthikna ba man la ka sienjam kaba ngi shim ha kano kano ka kyrdan, kaba la pyndonkam da ki nongialam bapher ka HNLC, kiba pyniaid shakhmat ia ki kam bapher lyngba ka jongki. Ngi dang peitngor bha halor kane bad ngim shym la kheiñ sting eiei” ula pynkut.
.){kind=link}