Rakhe ka HNLC ia ka ‘Martyr’s Day’s ban kynmaw ia ki riewshlur ka seng
Shillong, Nailur 21: Ka seng Hynniewtrep National Liberation Council (HNLC) ha ka sngi Palei, kala kam ba ki don bun ngut ki samla kiba wan ban pyniasoh sha ka seng bad pynkhreh ban thoh thymmai ia ka histori.
U General Secretary cum Publicity Secretary ka HNLC Bah Sainkupar Nongtraw ula ong “Ngi la shah pynbor ban pyniasoh bad ka Ri India hapdeng ka jingbyrngem bad pynap suloi, ym da ka mon lajong. Ka jingthaw ia ka HNLC ka dei kaba pynshong nongrim kat kum ka hok tynrai pateng la pateng ka Bri”.
“Bun ngut ki samla kila wan ban pyniasoh sha ka HNLC bad pynkhreh ban thoh thymmai ia ka histori” ula ong haba pyllait ia ka kyrwoh ka jingrakhe ka seng ia ka ‘Martyrs’ Day’ (ka sngi ki briew ba khlad ha ka jingiakhun) kum ka jingiathuh ia ki Nongialam bad ki dkhot kiba la pha iala ka jingim ha ka jingia khun ba khlem shongthait pyrshah ia ka jingklun beain bad thombor ka India.
U Bah Sainkupar ula ong ba u Sambor Mawthoh @ Dengdeng, u bat ia ka jaka ba kyrpang ha ka histori jong ka HNLC.
U Sambor ula duh iala ka jingim kum u ehrang ba nyngkong eh ka HNLC ha ka jingiather kuli bad ki Pulit ka Meghalaya ha ka 21 tarik Nailur, 1994 ha Jaiaw. Kum ka jingithuh ia ka jingaiti jong u iala ka jongim, ka HNLC kala pynbna ia kane ka sngi kum ka ‘Martyrs’ Dar jong ka seng, ula ong.
Ula ong ruh ba ka HNLC kala buh jingthoh thik pa thik ia baroh ki dkhot bad ki Nongialam kila aiti iala ka jingim ha ka jingiakhun jong ka Bri u Hynniewtrep.
“Ka jingphlei snam jong kine ki samla ba shlur kan ym shu sepei kai, kum ka HNLC kala kut jingmut ban pynthikna ba ka jingialeh jpng ngi kan long shibynta jong ka histori” ong une u General Secretary bad bynrap ‘Ka jingkongsan kane ka sngi ka shong ha ka jingkynmaw bad burom ia ki nongialam bad ki dkhot kiba shlur kiba la pha iala ka jingim ha ka jingiakhun ba khlem shongthait pyrshah ia ka jingwan klun jubor ka India”.
U Bah Sainkupar ula ong ba kam pat ju don kano kano ka jingialeh ba khlem da jaw snam, ka jingiakhun ba khlem umsnam, lane ka jingiakhih ban phai sa shiliang ka ngap ha ka histori.
Kat kum ka jingong jong u, ka jingiakhih ba jai jai kan ym long kaba seisoh lada ki nongthombor kim don ia ka jingsngew ne jingiatiplem.
“Ai ba ka mynsiem jong kine ki hero bala khlad noh kin ioh ia ka jingjahthait ka bym ju kot bad b aka nam jong ki kan iai bteng ha kaban ai mynsiem ia ki pateng ban wan ba kin ieng iakhun pyrshah ia ka jingshah leh bym hok bad jingthombor” ong u Bah Sainkupar.
“Ka ‘Martyrs’ day kan long kum ka jingpynkynmaw ia ka jingiakhun ba shonghok,ba kyntu ia ngi ban pyniaid shakhmat ia ka jingangnud jong ki bad ban ym sangeh ha ka jingwad ia ka jingbishar ba hok bad ka jinglaitluid jong ka Bri u Hynniewtrep” ula bynrap.
