Shillong, Rymphang 01 : Ka All India Congress Committee (AICC) hynne ka sngi Balang, kala pynpaw ba u Dr Mukul Sangma ula leh ia ka kam ba bakla eh ha ka kam sain pyrthei, ha ka jingim jong u da kaba leit iasoh sha ka All India Trinamool Congress (AITC).
Kane kala mih na ka Media Coordinator ka AICC ka Bobbeeta Sharma haba iakren bad ki nongthoh khubor haba ong “Da kaba burom ia u, nga sngew ba ula leh ia ka kam kaba bakla palat ha ka jingim jong da kaba iasoh sha ka AITC”.
Kane ka Heh AICC kala pynkynmaw ruh ba u (L) Purno A Sangma ula iasoh sha ka TMC hynrei kane ka jingiadei jong ki, kam shym la eh slem bad kala kut shiteng por haba ong “Ha kane ka kynti ruh, la sngewthuh ba ki paidbah ka Meghalaya kin nym pdiang ia ka TMC namar ba ka deika party nongwei”.
Ka Bobbeeta kala ong ba ka Trinamool Congress kan nym jop satia bun tylli ki seat ha kane ka elekshon ban wan.
“Ngi la ioh lum khubor ba kin (AITC) nym jop bun satia ha Ri-lum Garo bad ngam tharai ba kin lah ban leh bha ha Ri-lum Khasi. Ta ka daw nga sngew ba u (Dr Mukul) la leh ia ka kam ba bakla eh ha ka kam sain pyrthei da kaba ieh ia ka Congress party”. kala bynrap.
U Dr Mukul uba dei u Nongialam ka Liang Pyrshah mynta, un mih iakhun na artylli ki constituency kata na Songsak bad na Tikrikilla-ha kane ka elekshon ban wan.
