Guwahati, Iaiong 22 : U Myntri Rangbah (CM) ka Manipur u N. Biren Singh hynnin ka sngi Thohdieng u la ong ba kam shym la don satia kano kano ka jingiakynad hapoh ka seng BJP ha ka jylla.
Hynnin ka sngi Thohdieng ka party ka la khot pynlong ia ka jingialang jong ki nongialam hapoh Imphal.Ha kane ka jingialang ki la don katto katne ngut ki MLA ki bym shym la wan iashim bynta.
Dang shen laingut ki MLA kas BJP ki la iehnoh kam na ki kam ne post bapher bapher kiba ki bat da kaba pynpaw halor ki kynrum kynram kiba don hapoh ka party synshar BJP ha ka jylla.
Haba kren sha ki lad pathai khubor, na ka liang u CM ka Manipur u N Biren Singh u la ong, “Uwei u myntri ula pyntip sha Nga ba un ym lash ban wan iashim bynta ha kane ka jingialang namar ka jingleit sha Indore.Laingut kiwei pat ki dang don hapdeng ki jingshah sumar ha Delhi.Kam shym la don satia kano kano ka jingiakynad hapoh ka party bad baroh ki la wan iashim bynta sha kane ka jingialang.”
Ha ka sngi Palei ba la lah, u MLA P Brojen Singh u la phah ia ka shithi iehnoh kam kum u chairman jong ka Manipur Development Society. Une u dei u MLA uba lai u ban iehnoh na ka kam kaba u bat tang hapoh jong ka shitaiew.
Ha ka shithi sha u CM ka jylla, u la ong; “Nga phah ia kane ka shithi iehnoh na kane ka kam kum u chairman ka Manipur Development Society (MDS) namar ki daw shimet.”
Dang shen ki nongmihkhmat ka BJP ka jylla kiba kynthup ia u Thokchom Radheshyam Singh bad u Karam Shyam ki la iehnoh na ki kam kiba ki bat hapoh ka sorkar.Baroh kine ki arngut, kata u Karam Shyam bad u Thokchom Radheshyam Singh ki la bat kum ki Myntri sorkar ha ka sorkar barim ba la ialam da ka BJP ha u snem 2017-2022, kata haspoh ka jingialam jong u N Biren Singh.
Ki tyllong khubor ki iathuh ba katto katne ki nongialam kila leit sha New Delhi ban iakynduh ia ki nongialam ka Central ban pynpaw pyrshah ia u CM N Biren Singh.
