Pdiang burom ka NPP ia ki nongialam ka Congress WKH
Nongstoin, Risaw 27 : U Nongialam ka NPP bad Symbud Myntri Rangbah ka Jylla Bah Prestone Tynsong ula ther tyngeh ia ki briew kiba kam ieid Jaidbynriew tang ban shu pynshongshit paidbah hynrei ki klet pat ba ki hap ban synniang ruh da ki kam ki ban pynim bad kyntiew ia ka roi ka par bad ka ioh ka kot jong ka Jaidbynriew”.
U Bah Prestone ula kynthoh ia kane ha ka jingialang pdiang burom ia ki nongialam ba hakhmat duh ka Congress ka West Khasi Hills, kiba la wan pyniasoh ialade sha ka National People’s Party (NPP) ha ka sngi Nyngkong ha Nongstoin.
“Ia ka kyntien ieid Jaidbynriew la pynpoh dor shisha da ki riewshit Jaidbynriew kiba khwan bad pyrkhat ia ka myntoi lade. Ka suk palat ban kam ba ngi ieid Jaidbynriew hynrei kaba kongsan ka long ym ban shu kam tang da ki rymmiang shyntur, pyni ruh da ki kam bad katno phi la synniang sha ka roi ka par bad ka ioh ka kot ka Jaidbynriew. Ka Jaidbynriew kaba khraw ka ioh ka kot, kaba roi kaba par ka dei ka Jaidbynriew kaba khlain” ula ong.
U Symbud Myntri Rangbah ula ther tyngeh ruh ia ki briew kiba wohdong bad bein ia ki jingtreikam ka Sorkar MDA ba ialam da ka NPP bad ong “Ban iakren ia ka jingshisha, naduh ba ka NPP ka la bat ia u lakam ban synshar ha u snem 2018, ka Sorkar kala pynlut bun ia ka por ban pyrkhat ha ki kam pynroi, ban pynpoi surok man ki shnong, phaikhmat sha ki samla, phaikhmat sha ki nongrep, sha ki longkmie ha ki shnong ki thaw da kaba iarap ia ki Self Help Group bad ter ter. Ym pat ju don Sorkar kum ka Sorkar MDA ba ialam da ka NPP, ula ong.
“Nga la don ha ka Sorkar naduh u snem 2003 ha ka por ba synshar ka Congress, hynrei dei tad hau 2018 bad haduh kane ka khyllipmat ba ka jingpynlut pisa ka Sorkar tang ha ka jingshna surok, kala kot ym duna ia ka T.5000 klur” ula ong haba bynrap “Ha ka por ka Sorkar u Dr Mukul, kaba bun eh kaba pynlut ka long T.400 klur”.
U Bah Prestone ula ong ba ka surok na Nongstoin sha Maweit ka dei kawei na ki kam kiba shimkhia da ka Sorkar MDA ha West Khasi Hills bad ia kane ka surok yn sa pynbteng ruh naduh Maweit sha Nongjri.
“Ngam don por ban jer lut ia ki sector kaba ngi la leh bad ngi dang leh, hynrei nga ngeit skhem ba ki paidbah kin sa iohi ia kiba bun kiei kiei. Lehnohei ba ngin shu ia pyrta ha surok tang da ka shyntur suda ym don jingmut” ula kynthoh.
Haba pdiang burom ia ki nongialam ka Congress ka WKH, u Bah Prestone ula pynpaw ia ka jingsngewnguh bad sngew burom ia ka jingwan iasoh sha ka sem ka NPP hapoh ka jingialam u National President bad Myntri Rangbah ka Jylla Conrad K Sangma bad ong ba kane ka jingwan, kan nang pynkhlain bad pynsuh thied shuh shuh ia ka NPP hapoh ka District.
“Nga kyrpad ia baroh ki nongialam jong ka District bad ki 3 tylli block, ba sngewbha ban iakhot ia wer ia ki paidbah bad ban iatreilang kum ka kynhun ha ka ban pyntyllun ia ki kam sha ka elekshon 2028”, ong u Bah Prestone
Ia kane ka jingialang la pynlong ha phyllaw jong ka IB, PWD bad kiba la iadonlang ki kynthup ia u Nongaiktien ka NPP Bah Himalaya M Shangpliang, MLA barim Bah Bah Gigur Myrthong, MLA ka Nongstoin Bah Gabriel Wahlang MLA Nongstoin, MLA ka Rambrai R.G Momin MLA, MDC ka Rambrai Bah Lurshai Kharbani, bah N.Nongdkhar bad bah Nondi Diengngan,
