Shillong, Iaiong 08: Ka seng Vishva Hindu Parishad (VHP) ka burom iaka jinglong kyrpang ki trai ri trai muluk bad ka don bynta ban pynneh pynsah bad ban burom iaka hok jong ki paidbah ban ngeit ne ban leh ia kano kano ka jait niam.
Ia kane la pynpaw daka VHP hadien ba ka seng Khasi Students’ Union (KSU) kala pynrem jur iaka jingshim bynta ki dkhot ka VHP haka jingiaid paidbah ha kylleng ka nongbah Shillong haka 2 tarik mynta u bnai kaba dei ruh ka sngi U Blei.
Lah ban kdew ba dang shen ka KSU kala kynnnoh ba ka seng VHP kala pynlong iaka jingiaid paidbah bad ha kane ka jingiaid paidbah ki dkhot ka VHP kila sangeh hakhmat ka ïingmane bad kila pyrta Jai Shree Ram kaba la wanrah ruh ka jingshong syier ki paidbah kiba leit sha ki jingiaseng.
Haba iadei bad kane, ka VHP ka pynpaw ba ha kane ka jingiaid paidbah kam shym la mih kano kano ka jingklumar namar ia kane ka jingiaid paidbah la pynlong katkum ki kyndon bad la pyniaid beit iaid ryntih haka jingiatreilang bad ka ophis Superintendent of Police (SP) ha kaba ki Pulit kila synran lang.
Ka VHP kala pynpaw ba ka jingpyrta Jai Shree Ram kadei ka dustur ha kaba ki riewngeit Hindu ki pyrta kum shi bynta ban burom ia u Blei ‘Lord Rama’ bad naka liang ki dkhot ka VHP kim shym la pyrta kino kino ki kyntien ban wanrah ka jingia sngewpher jingmut bad kiwei ki niam.
