Ka UCC kan pynduh pyndam ia ka dustur u Khasi ba shim jait na ka Kmie :KJCLF

Shillong Naitung 14: Ka Khasi Jaintia Church Leaders’ Forum (KJCLF) ha ka sngi Thohdieng kala pynpaw baka jingpyntreikam iaka Uniform Civil Code (UCC) kan pynduh pyndam noh iaka dustur tynrai jong ka jingshim jait na ka Kmie kaba dei ka dustur jong u Khasi.

Ha ka kyrwoh khubor, u Secretary jong ka KJCLF u Rev Dr Edwin H Kharkongor ula ong, baroh ki jaidbynriew bad ki niam ki don iala ka jinglong kaba kyrpang bad iaka rukom treikam ha kaba iadei bad ka shongkha shongman, ka jingpyllait san shyieng, ka jingai pateng iaka spah ka phew bad kumta ter ter, katba ki don pat ki jaidbynriew kiba don ia ki jingiapher hapoh jong kawei ka riti dustur.

“Ha ki jaidbynriew Khasi jong ka jylla Meghalaya, kan long ka jingma kaba khraw ia ka jingai jait bad ia ka riti dustur tynrai da ka jingpyntreikam iaka Uniform Civil Code bad kan pynmih iaka jingpynrem kaba jur bad ka jingbym pdiang iaka jingpynduh jait noh iaka jingai jait kmie kaba dei ka riti dustur tynrai bad kaba phyla jong ki paid Khasi” ula ong.

U Rev Kharkongor ula ong ba ka ri mynta ka la banjur iaka jingdonkam iaki prokram ban tei ia ka imlang sahlang bad ban don iaka jingiadei kaba iajan ha ki kyrdan bapher bapher bad hapdeng jong ki nongshong shnong baroh.

Ka ri mynta ka donkam kyrkieh iaka jingpyntreikam pura iaki prokram kiban kyntiew iaka ioh ka kot bad iaka imlang sahlang baroh kawei bad ban kyntiew ruh iaka jingsuk bad ka jingbishar kaba hok.

“Kan ym long kaba biang ia mynta ban iaid shakhmat bad kaei kaba ka 21st Law Commission jong ka ri India kaba la pynpaw hashwa ba ka UCC “Kam long kaba donkam ne kaba iahap ha kane ka por” la ong u nongialam ka KJCLF bad ka bynrap, ban iaid shakhmat bad ka mat UCC ban pyrshah iaka jingangnud jong kiba bun ki nongshong shnong ka pyni ba kadei ka jingleh meng bad ka jingbym suidniew jong ka sorkar kaba don ha ka bor mynta.

Pule ruh: Meghalaya: Catholic Church raises objections, expresses serious concerns on UCC