Shillong, Nailar 22 : Niew ia ka kum ka jingbha nusib lane dei ka jingai sngewbha na u Rahul Gandhi sha ka Mamata Banerjee, hynrei ka Trinamool Congress (TMC) kan jin da nym ioh rung suk ha Meghalaya, khlem ka jingmih syep.
Ka TMC ka lah ban ioh bat mynta ia ka shuki Leader of Opposition (LO) ha ka IIngdorbar Meghalaya Legislative Assembly, ka ban long ruh ka sien kaba ar. Ka dei ka rukom ba u Nongialam jong ka party ba bun paid eh ha ka Liang Pyrshah un ioh ia ka shuki LO.
U Myntri Rangbah barim ka Jylla Dr Mukul Sangma bad mynta u Nongialam ka TMC lane u President ka TMC Bah Charles Marngar, ki lah ban long u LO. Kaba phylla, u Dr Mukul Sangma ula bat ia ka kam LO ha ka samoi barim ka Iingdorbar Thaw Ain ba kynthup kum u MLA ka congress bad TMC.
Hynrei ha katei ka por, u Dr Mukul ula tynrah nadien ia ka Congress bad khring haduh 11 ngut ki MLA ka party ban kynthih diengkper sha ka TMC ba ialam da ka Mamata Banerjee ha u snem 2022.
Kaba thamula, ka Congress ka dei kaba jop bun eh ki MLA ha ka elekshon 2018 da 21 ngut. Ka National People’s Party (NPP) kala wan ba-ar da 20 ngut, hynrei daka jingstad u President ka NPP Conrad K Sangma ban leh politics, kala pynduh lad ia ka Congress ban wan ha ka bor.
Ka NPP kala thaw ia ka Sorkar bad ki seng riewlum katba u Nongialam ka Congress Dr Mukul Sangma ula shah jied kum u LO. Ula ialam ia ka party ha kiba bun ki jingiatai kiba thnem bha bad u nongialamka NPP bad Myntri Rangbah ka Jylla Conrad K Sangma hapoh ka Iingdorbar Thaw Ain.
Hynrei tang da ki snem, ka jingdon MLA ka Congress kala hiar sha ka 17 ngut hapoh ka Iingdorbar bad hadien kane, u Dr Mukul ula wanrah ia ka erlangthari kaba la jan pynngam syndon ia ka Congress ha Jylla.
Ka Congress kala pra phom bad kala sah satang 5 ngut ki MLA hapoh ka Iingdorbar hadien ba u Dr Mukul bad ki 11 ngut ki para MLA ka Congress kila leit iasoh noh sha ka TMC. Kynsan kynsan, ka lama jong ka TMC kala khaweh bad kane ka party kala shu ioh ei kha ma kha ia 12 ngut ki MLA.
Ka TMC kala shu long ei ka party kaba wan ba-ar ha ka jingdon MLA ha Meghalaya khlem da iakhun ia ka elekshon MLA 2018.
Namar kane ka jingkylla ka sain hima sima, ka TMC kala kynshew laki laka ha ka elekshon MLA 2023 ha Jylla bad kala pynlong ruh ia ki rynsan ialap elekshon kiba heh bha ha Jylla. Bun ngut ki khlur ialap elekshon ka TMC kynthup ka Mamata Banerjee kila wan ban ialap elekshon ha Jylla hynrei hadien ba pynbna ia ka result, kane ka party kala jop tang 5 ngut ki MLA.
Kiba bun ki MLA ka congress kiba leit iasoh sha ka TMC kila shah rem ha ka elekshon lait noh katto katne ngut kum u Dr Mukul bad u Bah Charles.
Ka Congress kaba la troin, kala lah ban khie khlieh da ka jinglah ban jop haduh 5 ngut ki MLA kaba iaryngkat bad ka TMC bad kala ioh ruh ban bat ia ka shuki LO. U Bah Ronnie V Lyngdoh, ula shah jied kum u LO ka Iingdorbar Thaw Ain ka Jylla.
Hynrei ka congress kala mad biang ia ka nusib jot bad kala aiti biang ia ka TMC sa kawei ka lad ban long ka Liang Pyrshah ba bun paid duh ha Iingdorbar bad uwei na ki Nongialam ban long u LO.
Hakane ka kynti, ka Congress kala duh noh ia 3 ngut ki MLA kiba la leit pyniasoh sha ka NPP bad kine ki dei u Bah Gabriel Wahlang, Bah Charles Marngar bad Dr Celestine Lyngdoh nalor u Saleng A Sangma uba la iehnoh ia ka kam MLA hadien ka jingshah jied kum u MP ka Lok Sabha na Tura. Ka Congress mynta kala sah satang uwei u MLA (Ronnie V Lyngdoh) hapoh ka Iingdorbar.
U Lamphang ka Iingdorbar Thomas A Sangma, um don lynti pat da kumwei ha kaban ai ia kashuki LO sha uwei na ki Nongialam ka TMC kaba la kylla bun paid eh ha ka Liang Pyrshah.
 ha ka IIngdorbar Meghalaya Legislative Assembly, ka ban long ruh ka sien kaba ar. Ka dei ka rukom ba u Nongialam jong ka party ba bun paid eh ha ka Liang Pyrshah un ioh ia ka shuki LO.){kind=link}