Shillong, Naiwieng 28: Ka tnat Social Welfare kala ioh pdiang ia ka jingtyrwa (proposal) na ki katto katne ki Dorbar Shnong, kiba kloi ban ai jaka ei ia ka Sorkar ba kan tei ia ki Rehabilitation Centre ha ki shnong jong ki.
Ia kane la pyntip da u Myntri ka tnat Social Welfare u Bah Paul Lyngdoh uba iathuh ba kane ka jingtyrwa sha ka Sorkar kadei naka bynta ban pyntreikam iaka Drug Reduction Elimination and Action Mission (DREAM) projek jong ka tnat.
“Kila don ki Dorbar Shnong kiba la tyrwa ban ai jaka ei sha ka tnat ban tei ia ki Rehab Centre naka bynta kito kiba kyrni Drok hapoh ka projek DREAM ban iakhun pyrshah iaka jingma ka ba mih na u Drok” ong u Bah Paul.
U Bah Paul ula ong ba kane ka jingwan shakhmat ki katto katne ki Dorbar Shnong kadei ba ki kwah ban iatreilang bad ka Sorkar ban rat dkhong ia u drok nala ki shnong.
Ula ong ba kane ka long kaei kaei kaba sngewtynnad bad ka paw ba ka imlang sahlang, ka don ka jingkit khlieh ban iakhun pyrshah iaka jingkyrni Drok.
