Dimapur, K’lyngkot 07: U Myntri kam pohiing ka sorkar pdeng u Amit Shah hynnin ka sngi Thohdieng ula ong ba ka sorkar pdeng ka don ia ka jingangnud ban pynurlong ia ki laitylli ki mat kiba iadei bad ka jingsuk, ka jingkiew jong ka ioh ka kot bad ka roi ka par hapoh Nagaland bad kiwei pat ki jylla ka thain shatei lammihngi (Northeast).
Haba plie ia ki santylli ki projek kam pynroi kiba kot sha ka T.52 klur ha Nagaland, u Amit Shah ula pynpaw ha ka jingialang da kaba ong nalor ka mat kaba iadei bad ka jingpynduh pyndam ia ki kam lehnoh, ka thong jong ka sorkar u Myntri Rangbahduh (PM) Narendra Modi kam dei tang halor ka jingkyntiew bad ka jingpyniasoh kaba tang nalor hynrei ban kyntiew ruh ia ka jingiadei kaba jan hapdeng ka thain Northeast bad kiwei pat ki bynta jong ka ri.
Kine ki santylli ki projek ki kynthup halor ka jingkyntiew ia ka pule puthi, ki kam jngohkai pyrthei, ka jingkyntiew ha ka kam bording bad ki jingpyniasoh bad ka jylla.
Nalor kata u Shah ula ong ruh ba ka thong kaba hakhmat eh na ka bynta ka thain Northeast ka long ban kyntiew ha ka liang ka ioh ka kot bad ka roi ka par, bad lyngba ka hukum jong u PM Modi ki myntri ka sorkar pdeng ki la pynlong ka jingwan jurip ba khah khah ia kane ka thain, katba na ka liang u PM Modi da lade hi ula pynlong ka jingwan jurip kaba haduh 51 sien sha kane ka thain Northeast ha kine ki phra snem kiba la dep.
“Naduh ka snem 2014, ka bhah jingiarap pisa na ka bynta ka Nagaland kala kiew sha ka saw shah nalor ka song jingiarap ba kyrpang kaba kot sha ka T.219 klur ia kaba la pynioh na ka bynta kane ka jylla.Ka 15th Finance Commission ka la pynkhreh ia ka mangtyngka kaba T.4,773 klur na ka bynta ka Nagaland ha u snem 2022-23, hynrei ka mang ka long tang T.1,283 klur haba phai sha u snem 2009-10,” ong u Shah.
Utei u myntri ka sorkar pdeng ula ong ruh ba ki kam lehnoh ha ka thain Northeast kala hiar sha ka 74 percent ha kine ki phra snem kiba la leit noh, ula ong ba ka jingpyntreikam ia ka ain kaba aibor kyrpang ia ki shipai ne ka Armed Forces (Special Power) Act) la nang weng noh na ka thain bad hapoh Nagaland.
Shuh shuh u Shah ula ong ruh ba ka Nagaland ka dei kawei napdeng ki 25 tylli ki jaka ba pawkhmat ha ka pyrthei kiba don ia ki jaka kiba kyrpang kiba lah ban khring ia ki kam jngohkai.Ka Nagaland ka pawkhmat ha ka pyrthei baroh kawei namar ki nongshong shnong ki jong ka, ka kolshor bad ka jingiaryngkat kyrdan ba la pynkhamti na ka bynta ki kynthei.
U Shah ula wan poi ha Nagaland ha ka sngi Thohdieng ba la lah hadien ka jingwan jngoh shapoh Tripura bad Manipur naduh ka sngi Palei ba la lah.
