Shillong, Naiwieng 07: U Symbud Myntri Ragbah ka Jylla uba khmih ia ka Kam Pohiing u Bah Prestone Tynsong, ula banjur ia ka jingkongsan ban pynneh pynsah ia ki tamasa tynrai hapoh Meghalaya bad ka sorkar jylla kala phaikhmat bha ia ki tamasa tynrai.
Ula kren ia katei haba batai ia ka jingiapher hapdeng ka Shad Nongkrem bad ka Cherry Blossom Festival, ha kaba ula ong, ba ka Shad Nongkrem kadei kaba iadonbynta bad ka lehniam lehrukom tynrai, katba ka Cherry Blossom kadei kaba la pynlong da ka sorkar da ka jingthmu ban ailad ia ki trai jylla ban pyni ia ka sap ka phong.
“Haba phi kren shaphang ka Cherry Blossom Festival, ka iapher palat na kane ka Shad tynrai. Ka (Shad Nongkrem) kadei ka shad tynrai kaba naduh ki por hyndai bad kadei ruh ka shad kaba iadobynta bad ka lehniam. Hynrei haba phi kren shaphang ka Cherry Blossom Festival kaba ngi don, kaba ka sorkar ka donbynta lang ka iapher bak la bak. Kane kadei ban pynthikna ban pyni ia ka sap ka phong kaba ngi don ha ka jylla Meghalaya, ngi don ia ki nongrwai ki bapher bapher, ki khynnah shynrang bad kynthei kiba don ia ki sap ki phong. Nga tharai kane kadei kaba iapher bha na kiwei pat ki tamasa kiba ngi don” ong u Bah Tynsong haba iakren bad ki nongthoh khubor, hynne ka sngi ha Smit.
U Bah Tynsong ula pynthikna ba ka sorkar kan pynbiang ia ki jingai jingiarap pisa sha ki kynhun kiba pynneh pynsah bad ban pynkhlain ia ki jingshad tynrai kum ka shad Wangala, ki Jingshad ka Seng Khasi bad ka Behdeinkhlam.
Ula kyntu ruh ia baroh 3 tylli ki District Council kiba kynthup ia ka KHADC, JHADC bad GHADC ba kidei ban pynshlur ha kaban pynneh ia ki jingleh kiba la rim la jah bad ia ki aiñ kiba rim ba jah hapoh ka jylla.
Ha kaba iadei bad ka jingsdang jah jongki jingleh tynrai, u Bah Prestone ula banjur ia ka jingdonkam ban leh ia ki jingwad bniah ne Research bad ban pynneh pynsah bad ka kyntu ia ki District Council ba kin shim ia ki sienjam ban kyntiew bad ban iada ia ki kolshor kiba kyrpang bad riewspah bad ruh ban pynshlur ia ki briew ban pynthikna ban ialeh ban pynneh ia ki jingleh bad ia ki aiñ kiba naduh kulong kumah kiba la bud ryntih da ki longshwa manshwa.
