Shillong, Jymmang 15 : Watla ka jingpynbor ka jur na ki seng sain pyrthei ba don ha ka Liang Pyrshah, ka Sorkar Jylla kan shim iala ka jong por ha kaban rai ia ka kam ba adei bad ka Reservation Policy bad ka jingpyntreikam ia ka Roster System hapoh ka Jylla, ong ka Nongaiktien ka Sorkar MDA bad Myntri Sorkar kong Ampareen Lyngdoh hynne ka sngi Nyngkong.
“Kane ka dei ka kam kaba hap phikir bha. Ngi hap ban phikir bha. Ka biang lada ki dkhot ka Liang Pyrshah ki pynbor ia ngi hynrei ngin shim iala ka jong ka por ban rai kumno ba ngim pyntyllun shakhmat ia kane ka kam” ong ka Kong Ampareen haba iakren bad ki nongthoh khubor.
Kane ka jingkynthoh kala mih hadien ba ka Voice of the People Party (VPP) kala pynbna ia ka jingiakhih jong ka kylla ba nyngkong da kaba pynlong ia ka jingiashong kyllain mungor ban pyrshah ia ka jingbym lah ka Sorkar ban pynsangeh ia baroh ki jingthungkam thungjam tad haduh ban da dep pynbeit ryntih ia ka State Reservation Policy bad ka Roster System hapoh ka 48 kynta, kaba la kut ka jingaipor hynne.
Haba kylli, ka Myntri kala ong “Ngam lah ban kren ha ka jaka jong ka Sorkar halor kane ka kam hynrei shimet hi, nga ngeit b aka Sorkar MDA-2 kala trei shitom ban iasyllok bad iakren bad baroh ki paralok kiba don ha ka Sorkar bad hadien kan sa khot ia ki seng sain pyrthei, ki sengbhalang bad ki seng ki samla pule”.
“La khmih lynti ba u Myntri Rangbah ka Jylla un sa wan poi lashai ka sngi ha Shillong, la kumno kumno lashai ne lashisngi. La thikna, b aka don ka jingthmu ha ka jingmut jingpyrkhat jong ngi bad khlem pep ngin sa iakren ia kane ka kam. Kam dei sati aba ngi kiar ban iakren halor kane ka kam” kala bynrap.
Ka Myntri kala ong b aka Sorkar ka donkam ban pynthikna ba baroh ki kynhun kin iadon bynta lang hashuwa ban shim ia kano kano ka rai halor kane ka kam.
“Ngin sa shim ia ki jingai jingmut na baroh, ngin pynthikna ba ngi khmih ia kine ki jingai jingmut bad ngin sa iakren ia kano kano kaba tei bad ba ai jingmyntoi hashuwa ban shim rai ia kane ka kam” kala ong.
Dang shen, u Myntri Rangbah ka Jylla ula kular ba ka Sorkar kan sa sdang ia ka jingiakren bad ki kynhun bapher bapher halor ka Reservation Policy bad ka Roster System hadien ka 15 tarik Jymmang.
