Shillong, K’lyngkot 24 : U Myntri bad Nongaiktien ka Sorkar Bah Paul Lyngdoh ha ka sngi Balang, ula ong ba ka Sorkar kam peit satia ia ka kynhun kiengatiar Hynniewtrep National Liberation Council (HNLC) kum ka ‘Nongshun’.
U Bah Paul ula kynthoh ia kane haba jubab ia ka jingkylli halor ka jingpynkhreh ka Sorkar ia ki bor pahara na ka bynta ka jingrakhe Republic Day khamtam hadien ka rai ba dang shen jong ka HNLC ban weng noh ialade na ka jingiakren iasuk bad ka Sorkar.
Haba iakren bad ki nongthoh khubor hadien ka jingialang jong ka Kynhun Myntri, kaba la ai jingmynjur ia ki jingkren lamphrang bala pynkhreh jong ka Republic Day, u Bah Paul ula ong ba ka jingpynkhreh ia ki bor pahara kan iaid beit kumba ju leh.
Hynrei ula ong ba ka suk ka sain ha Jylla ka dei kaba biang bad kam da donkam satia ban nang shim shuh shuh ia ki lad pahara bala pynkhreh.
U Bah Paul u iathuh ba u Myntri Rangbah ka Jylla Conrad K Sangma bad u Symbud Myntri Rangbah ka tnad kam pohiing Bah Prestone Tynsong kila pynpaw ba ka jingkhang ka dang iai plie ban iakren bad ka HNLC haba bynrap “Kane kan sa mih ruh ha ka jingkren jong ka Republic Day”.
Haba kylli, u Myntri ula ong “Ka jinglong jingman ka long kaba suk bas ain bad ngim peit ia ka HNLC kum ka Nongshun jong ngi ne ki paidbah ban gin khuslai..ta ka daw ngi ong b aka jingkhang ka dang plie bad ia kane yn sa pynpaw ruh ha ka jingkren Republic Day”.
