Shillong, Rymphang 21 : U Myntri Rangbah ka Jylla Conrad K Sangma ha ka sngi Balang ula pynpaw ia ka jingbym lah jong ka Sorkar Jylla ban thied jaka ha kaban ai jingiada ia ki khlaw ba hap hapoh ki Catchment Area.
Haba jubab ia ka jingiatai halor ka jingkren u Lat, u Conrad ula ong “Watla ka jingtyrwa ban thied ia ki catchment area ka dei kaba biang eh hynrei ka jingdonkam pisa ka long kaba bun bah bad ngi lehse ngim ym lah ban leh ia kane”.
U Conrad ula pyntip ruh ba ka Sorkar jylla kala mang T. 344 klur hapoh ka Megh-Arise ban iada ia ki catchment area ha Shillong bad ha Tura.
“Namar kata, ngin pyrshang ban buria ia ka jinglutksan ki trai jaka naba ka dor ban thied ia ka jaka ka long kaba hehbha” ula ong.
Halor ka jingkynrei u droks, u Myntri Rangbah ula pyntip ba haduh 696 tylli ki case la dep ban chargesheet bad palat 14000 gram u heroin bad 2700 gram u opium la ioh ban kurup.
“Khnang ban pynsangeh ia ka jingwan rung u droks, ngi lah thaw ia ka DREAM Project ban leh eiei halor kane ka kam” ula ong.
Haba kren halor ka jingjaboh ka lyer ha Byrnihat, Ri-Bhoi, u Conrad ula ong ba ka jingpynduh noh ia ki licence ka lah ban nym dei ka lynti ban iaid shakhmat namar ka Jylla ka dang phaikhmat sha ka jingwan kynshew kam bad ka jingdain duna ka lah ban long ia kito kiba pynkhein ain.
Ula kular ruh ban sa shimkhia mardor ia ka jingujor halor ka jingsam ia u khaw tad dor sha ki paidbah.
U Myntri Rangbah ula pyntip ruh ba ka song pisa ba T.5000 klur bala tyrwa ban pynlut sha ka New Shillong Administrative City khlem pep kan pynkylla dur ia ka Nongbah jong ka Jylla.
