“Ka Sorkar kam kwah ban khyllem ki ADC” | Ki ADC kin hap pynkylla ia ka rukom treikam

Batai shai u Myntri ia ka nongrim ban iarap siew tulop sha ki Nongtrei ADC

Shillong, Nailar 28 : U Myntri Sorkar bad nongialam ka UDP Bah Paul Lyngdoh ha ka sngi Palei ula ong ba ka jingtyrwa ba dang shen jong ka Sorkar ban siew tulop ia ki nongtrei ki District Council, ka dei ka plan iarap pisa ban wanrah jingkylla, kaba thmu ban khanglad ia ka jingtyrkhong ka pla tyngka jong ki Autonomous District Council (ADC) ha Meghalaya.

Kat kum ka jingong jong u, ka jingtyrwa ka Sorkar kam dei ka blank cheque (ka cheque bym kdew ia katno ka pisa) hynrei ka jingkyrshan da ka kyndon ba donkam ba ki ADC kin wanrah ia ka jingpynkylla ha ka rukom treikam.

Ka Sorkar Jylla kala thaw ia lai tylli ki sub-committee ban iakren bad ka GHADC, KHADC bad JHADC-halor ki jingtyrwa ban wanrah ia ki jingpynkylla ha ka jingpyniaid ia ka pla tyngka ba kynthup ia ka jingsiew ia ka tulop sha la ki jong ki nongtrei- bad ban aiti ia ka kaiphod hapoh ka 45 sngi.

“Ka long kaba kongsan ban pyniapher hapdeng ka jingai pisa mon sngewbha bad kaei kaei kaba dei ban leh. Ha kane ka kam, kaei kaba ka Sorkar ka tyrwa ka dei ka plan iarap pisa ban wanrah jingkylla namar artylli na ki ADC kila hap iaksaid ha ka pisa tyngka. Lada ki dang iaid ha kane ka lynti treikam ba mynta bad ka jingpynmih pisa nalor ka jingbun palat ki nongtrei, kin sa khyllem tang hapoh lai ne saw snem. Namar kata, shuwa ba kan poi ha une u khep, kane ka dei ka jingtyrwa ba phin wanrah ia ka jingkylla ha ka rukom treikam. Na ka bynta kane ka jingkylla, ngi la ai ka jingkyrshan ia phi katne ha ka liang ka pisa tyngka” ong u Bah Paul haba iakren bad ki nongthoh khubor.

U Bah Paul ula ong ba ka Sorkar kala tyrwa ban kyrshan pisa ia ki ADC bad ma ki pat kin hap ban pynbeit ia ka jingdon ki nongtrei, ban pynkhlain ia ka jingpynmih pisa, bad pynyreikam ia kiwei pat ki jingpynkylla kiba donkam.

U Bah Paul ula pyntip ruh ba katto katne ki ADC ki dei kiba don bun palat ki nongtrei, bad kawei lei ka don ia ki nongtrei ba palat 1500 ngut.

Ula ban jur ba ka jingkyrshan jong ka Sorkar ka dei kaba don bad ka kynhon ia ki ADC ba kin shim ia ka sienjam kaba dei ha kaban wanrah ia ka jingpynkylla ha ka rukom treikam bad ka jingpynmih pisa.

“Nga iai ban ba ka dei ka sienjam kaba biang eh bala leh da ka Sorkar Jylla namar kumba phi iatip ba baroh ki ADC ki ju shaniah ia ka jingkyrshan baka Sorkar Jylla ka ai ha ki kum ka jingsam ia ka bhah khajna na ki marpoh khyndew bad kiwei kiwei. Ngi donkam markylliang bad ha kane ka kam, haba ngi iohi ba ki ADC ki jan poi sha u pud ban khyllem, ngi kwah ban tyrwa sha ki ia ka jingim bad kane ka dei ka jingim ba ka Sorkar ka tyrwa” ong u Bah Paul.

U Myntri ula pynpaw ruh ba ka jingthmu jong ka Sorkar ka dei eh halor ka jingpynbeit ia ka jingthung nongtrei bad ban pynthikna ba ki ADC kin don ia ka pla tyngka kaba biang.

Une u Nongialam ka UDP ula niew ia kane ka sienjam jong ka Sorkar kum ka lynti kaba bha bad iaroh ruh ia ki jingthmu pynkylla dur ia ki ADC.

Kat kum ka jingong jong u, ka Sorkar kam lah ban shu shong kli kti bad shu peit ba ki ADC kin khyllem, bad kane ka plan ban iarap bei pisa ka dei ka sienjam ba donkam ban khanglad ia kum kane ka jingmih.