Shillong, Nohprah 13: U Myntri Rangbah ka jylla u Conrad K Sangma hynne ka sngi Balang ula ong ba kila don bun tylli ki jingtei ia ki Indoor Stadium kiba la shna bad ka sorkar kan dang mang tyngka ban shna shuh shuh ia ki Stadium ha ka jylla ban kyntiew ia ki kam ialehkai.
“Ym tang ba kila don ki jingtei kiba la iaid shakhmat hynrei ngin sa nang mang shuh shuh ban tei ia kaba ngi la dep ban pynkhreh iaka thup ban tei sa kumba 40 tylli ki jingtei ha kylleng ka jylla bad ki kam ki jam kin sa sdang noh shen” ong u Myntri Rangbah haba iakren bad ki nongthoh khubor hadien ba lawai ka jingialang plie iaka Nongkseh Indoor Stadium kaba la long hynne ka sngi.
Ha kaba iadei bad ka jingthmu ban pynlong iaka Meghalaya Games ha Tura, u Conrad Sangma ula ong ba dang shen ula lum ia ka jingialang ha Tura ban pynlong iaka Meghalaya Games bad ka jingpynkhreh kala long kaba iaid beit kaba kynthup naduh ka jaka sah bad kiwei kiwei ki jingdonkam bad ka jingpynkhreh kan long kaba biang lut na ka bynta ban pynlong ia katei ka lympung ialehkai.
“Ngin mad ia ki jingeh namar ban pynlong iaka lympung ialehkai kaban wan iashimbynta haduh 4000 ngut ki briew kadei kaei kaei kaba ym pat ju pynlong teng ha Tura mynshwa kumta ngi wad ban ioh ia ka jingiatreilang naka imlang sahlang bad ki kynhun bapher, ki skul ki College bad mynta ngi dang pynleit jingmut ha kaban bhah tyngka naka bynta ban pynbiang ia ki jaka sah ia ki briew khnang ba kin ioh ban sah bad shisien ba la kut ki jingialehkai kumta kitei ki jingtei kin leit noh sha ki kynhun bapher bapher bad kumta ka dei ka jingmyntoi ia baroh arliang” ong u Conrad.
“Ngi khmih lynti ba katei ka lympung kan long kaba iaid beit ban ngin shimkhia bha ba kan ym don ka jingduna ne jingdkoh ha ka jingpynlong ia katei ka jingiakob ialehkai” ula ong.
Ha kaba iadei bad ka jingthmu ban pynlong ia ka National Games, u Conrad ula ong, ki kam kila iaid ha ka lynti kaba biang bad ka jingpynkhreh ban shna ia ki Stadium ruh kila nang iaid shakhmat bad ha ki 6 bnai haduh 12 bnai kiban wan, yn sa iohi iaki jingkylla kaba khraw ha ki jingtei ki bapher bad yn pyndep ruh ia ki projek kiba heh ha ki 12 bnai kiban wan.
